Lugo, 17 de marzo de 2025. O Tenente Alcalde do Concello de Lugo, Rubén Arroxo e a concelleira de Participación e Servizos á Veciñanza, Cristina López visitaron o Servizo de Información Municipal 010, que cumpre na xornada de hoxe 20 anos desde a súa posta en funcionamento. López destacou a importancia deste servizo, "unha peza clave na comunicación entre o Concello e as e os lucenses", e anunciou que "estamos traballando para poñer en marcha unha serie de melloras neste servizo que simplifiquen a atención a todas as persoas que chamen ao 010". Estas melloras buscan optimizar a experiencia do usuario, garantindo unha atención máis fluída e eficiente.

Cristina López destacou o esforzo realizado polo Goberno de Lugo no pasado mandato para municipalizar este servizo, asegurando que a atención á veciñanza se ofreza por parte de traballadoras municipais. "Unha medida moi importante que nos permitiu garantir a calidade calidade do servizo ofrecido", afirmou.

O 010 é un servizo que facilita información sobre trámites municipais, actividades e eventos. Permite tamén facilitar trámites como a solicitude de cita previa, dispoñible para varios servizos municipais, como Augas, Cemiterio, Estatística, Información ao Consumidor, Rexistro, Tarxeta Cidadá e Tesourería.

A edil de Participación afirmou que "este servizo é a ferramenta máis importante do Concello para abrir as instalacións municipais á veciñanza". A veciñanza de Lugo pode contactar co 010 a través do teléfono 982 297 350, eliminando así os custos de chamadas a números especiais.