Lugo, 03 de febreiro de 2023. A concelleira de Participación e Servizos para a Veciñanza, Cristina López, afirmou que “o sistema de cita previa permite que os distintos servizos den unha mellor atención ás persoas que precisan realizar trámites no Concello”. “Solicitando cita previa, a veciñanza sabe en que momento vai ser atendida, evitando as longas esperas que se vían nos distintos servizos antes de implantar este sistema”, explicou a edil de Participación, que engadiu “a proposta do grupo municipal de Ciudadanos de eliminar a cita previa levaríanos a aumentar o tempo de espera pola atención no servizo”.

López lembrou que os servizos antenden tamén sen cita previa ás persoas que se acheguen ao Concello “no primeiro oco libre dispoñible”, e afirmou que “para a maioría de servizos pode obterse cita no mesmo día ou como moi tarde, para o seguinte”.

O sistema de cita previa está dispoñible para os servizos de Cemiterio, Estatística, Información ao Consumidor, Rexistro e Tarxeta Cidadá. Para solicitar a cita, deberase iniciar o procedemento a través do formulario habilitado na web concellodelugo.gal, seleccionando o servizo ao que se dirixe e o tipo de trámite a realizar, e escoller a data e hora desexada para presentarse no Concello. Despois deberanse cubrir os datos persoais da solicitante, incluíndo un teléfono de contacto e un correo electrónico, medios aos que chegará unha mensaxe confirmando a reserva da cita.

A través do mesmo trámite da web do Concello, pode eliminarse unha cita solicitada previamente, liberando a hora para que outra persoa poida asistir a realizar un trámite nese momento. Cristina López afirmou que "queremos facilitar á veciñanza o acceso aos trámites presenciais no concello, garantindo que todas as persoas poidan ser atendidas de maneira fluída e sen retrasos".