Lugo, 19 de setembro de 2017. O voceiro do BNG no concello de Lugo, Rubén Arroxo, reclamou do goberno municipal que se proceda á retirada dos semáforos da ronda da Muralla. Arroxo afirmou que “reducir a 30 a velocidade na ronda era un primeiro paso para despois retirar os semáforos dando prioridade ás persoas e finalmente peonalizar a ronda”. O BNG lembroulle ao goberno municipal este compromiso incumprido nesta semana internacional da mobilidade.

Arroxo dixo que “agora hai que estudiar en que cruces se poden eliminar os semáforos que reteñen o tráfico” dixo que “coa velocidade reducida a 30 km/h hai que implantar medidas de calmado do tráfico na zona de cruces como, por exemplo, o de Nícomedes Pastor Díaz ou o Camiño Real” e explicou que “utilizando, nas inmediacións dos cruces, pasos de peóns elevados na Ronda xa sería posible regular a incorporación de vehículos á ronda con sinais de STOP”. O voceiro nacionalista lembrou que “xa exiten cruces que funcionan perfectamente con este sistema como é o caso de Poeta Noriega Varela”.

Rubén Arroxo pediu que se aproveite a redución de velocidade a 30 km/h para eliminar os semáforos e buscar “outro modelo de circulación arredor da muralla mentres non se peonalice completamente”. O BNG-AA xa pediu en marzo deste ano a eliminación de semáforos na ronda da muralla para darlle máis fluidez ao tráfico despois da implantación do límite de velocidade a 30 km/hora.

Rubén Arroxo sinalou que “non se trataba unicamente de reducir a velocidade na ronda se non de buscar un novo modelo para dar fluidez ao tráfico a través do seu calmado”. A proposta do BNG-AA vai encamiñada a conseguir que se poida dar unha volta á ronda da muralla a unha velocidade moderada pero, case sen facer paradas.

Tamén se podería estudar a creación dalgunha rotonda disuasoria para clamar o tráfico e garantir a fluidez como as que funcionan na av. de Madrid. Rubén Arroxo tamén se referiu a que “na rúa Anxel López Pérez, que forma parte do circuito da ronda da Muralla, xa existe un paso de peóns, non regulado por semáforos, que calma o tráfico garantindo a fluidez”.