Os grupos municipais recibiron unha comunicación da empresa municipal EVISLUSA na que se informaba do incumprimento dos estatutos por motivos da axenda da alcaldesa

Rubén Arroxo sinalou que “entendemos que a alcaldesa necesite tempo para coñecer a cidade, os barrios e as parroquias pero as obrigas son as obrigas”

Lugo, 10 de marzo de 2016. O voceiro do BNG – Asembleas Abertas, Rubén Arroxo informou da recepción dunha comunicación da empresa municipal EVISLUSA na que se informaba do aprazamento da xuntanza do consello de administración correspondente a este trimestre. Na propia comunicación reflexábase  que “no artigo 19 dos estatutos de EVISLUSA, recóllese que “o Consello celebrará sesión ordinaria, como mínimo, unha vez ó trimestre”.

Arroxo, amosou hoxe a súa perplexidade ante o feito de que a causa de aprazamento, desta xuntanza do consello de administración, era o feito de que a alcaldesa non atopase un oco na súa axenda para atender esta obriga. Rubén Arroxo sinalou que “entendemos que a alcaldesa necesite tempo para coñecer a cidade, os barrios e as parroquias pero as obrigas son as obrigas”.

Para o BNG – Asembleas Abertas “trátase dun claro exemplo de cales son as prioridades deste goberno municipal, do seu xeito de traballar e do seu compromiso con Lugo”. Rubén Arroxo dixo que “cando os lucenses nos trasladan que Lugo está paralizado é evidente que hai causas concretas e hoxe vimos unha destas causas nun comunicado oficial deste concello”. Dende EVISLUSA xestiónanse cuestións tan importantes como as axudas de alugueiro de vivenda e outros asuntos que afectan a moitas persoas como son as modificacións puntuais do PXOM e do PEPRI.

TEXTO ÍNTEGRO DA COMUNICACIÓN:

Bo día a todos, no artigo 19 dos estatutos de EVISLUSA, recóllese que “o Consello celebrará sesión ordinaria, como mínimo, unha vez ó trimestre”, polo que, para dar cumprimento ao dito artigo, habería de celebrarse a reunión ao longo do presente mes de marzo.

Solicitamos datas posibles en Alcaldía, pero por problemas de axenda, non vai ser posible celebrar a reunión ata o próximo mes de abril. Esperamos que isto non supoña un inconveniente para ningún de vós.

Rogámosvos que, por este mesmo medio e a maior brevidade, manifestedes a vosa conformidade ou non, para trasladar a reunión á segunda semana de abril (do 4 ao 9) e, e de ser o caso, se teriades problema algún deses días, todo isto co fin de que na medida do posible poder contar coa asistencia de todos os membros.

Agradecendo a vosa colaboración, quedamos á espera,