Lugo, 08 de setembro de 2022. O Tenente Alcalde do Concello de Lugo, Rubén Arroxo, xunto coa concelleira de Cultura, Turismo e Promoción da Lingua, Maite Ferreiro, visitou o barrio da Chanca, onde se veñen de instalar unha serie de paneis que recompilan lendas tradicionais sobre a vida do barrio e sobre a cultura do mesmo. Na visita, os edís estiveron acompañados por Antonio Reigosa e Noemí López, que traballaron na realización dos paneis, e con guías turísticas que desenvolven a súa actividade na zona de Lugo, para mostrarlles a nova acción do Goberno de Lugo.

Maite Ferreiro explicou que “queremos potenciar o atractivo turístico desta zona da cidade, que conta cunha longa historia e cun gran potencial, de maneira similar a como fixemos no barrio da Ponte nos pasados meses”, e destacou “a gran calidade das ilustracións de Noemí López e o destacable traballo de Antonio Reigosa no eido da investigación da mitoloxía popular e da tradición oral”.

Maite Ferreiro afirmou que “continuamos desde a área de Cultura, Turismo e Promoción da Lingua a mellorar a imaxe da cidade e a achegar ás veciñas e veciños e a todas as persoas que se acheguen a historia dos distintos barrios, a través de imaxes dunha alta calidade artística”.

Textos colocados nos paneis

A Chanca

Barrio antigo, nacido a carón do Camiño Primitivo de Oviedo a Lugo e do Rato, río con memoria de troitas, curtidurías e artesáns, lavadoiros e canles con que alimentar hortas e muíños.

A ponte, de orixe medieval, salta a corrente que en apenas 4 km. abraza o Miño.

«Ponte pétrea, comedida e sólida, segundo corresponde ás arquitecturas realizadas á medida do home e con sosego».

X. Pardo de Vera, Urbe de Lugo, 1994

Viaduto da Chanca

Impoñente obra con 20 arcos de 10 m. de luz, 298 de lonxiutude e 29 de altura máxima. Feito coas mans de homes e mulleres do barrio, comezou a construirse en 1871 e inaugurouse en 1879 para o camiño de ferro entre Galiza e Castela. O primeiro tren pasou en 1885.

Que ben rechifla o tren

pedindo vía franca...

o tren que vai ou vén

pola ponte da Chanca

Ánxel Fole, El Progreso, 16 de xuño de 1968.

Fonte da Chanca

Desta fonte manou auga ata o primeiro verán do s. XXI. Se cadra repousa, cansa de matar sedes de monturas, viaxeiros e peregrinos que por aquí pasaron antes da saudar a cidade aseados e saciados.

«...probable resto daquelas antigas fontes arcadas, escavadas no talude da vía con fornela e pía primitiva».

Ricardo Polín, Camiño a Lugo. Guía histórica e cartográfica do Camiño Primitivo de Santiago e señorío lucense, 2003.

A Calzada

A vella calzada que nos leva á cidade de Lugo antes era empedrada, estreita e abeirada de valos e casas. Agora, vítima do fervor urbanístico, fica soterrada, cruzada de modernas vías, baixo un manto de alcatrán e cemento. 

Esta cidade está feita dun xeito tan singular

que lles dá ben gusto a todos cantos a chegan a ollar

Hermannus Künig, Sannk Jakobs Strabe, 1495.

Carril das Flores

A rúa Carril das Flores, antigo camiño de carro ao abrigo de altos muros e casas de pedra, anuncia a entrada en Lugo pola Porta de San Pedro ou Toledana. 

O rei astuariano Afonso II, o Casto, primeiro peregrino que por aquí pasou camiño de Compostela, pisouna, coma ti hoxe, hai mil douscentos anos