Lugo, 27 de marzo de 2023. A concelleira de Cultura, Turismo e Promoción da Lingua, Maite Ferreiro, destacou no Día Mundial do Teatro que a programación teatral do Auditorio Municipal “inclúe só no primeiro semestre do ano máis de 40 actividades con diversos recoñecementos a nivel galego e estatal”.

O Auditorio Municipal acollerá nestes meses a espectáculos gañadores dos principais premios de artes escénicas do estado, con dous premios MAX, outorgados pola SGAE aos mellores espectáculos de artes escénicas, e 5 premios Fetén, outorgados durante a Feira Europea das Artes Escénicas para Nenas e Nenos que se entregan cada ano en Xixón. Ademais, a programación conta con espectáculos recoñecidos con diversos premios, como o Luísa Villalta da Deputación da Coruña, o premio BBVA de Teatro, ou o premio Territorio Violeta, ata completar os 10 galardóns que recibiron os distintos espectáculos que conforman o semestre.

"Quixemos poñer o foco nas producións de artes escénicas de mellor calidade feitas na Galiza, que serán o fío condutor da programación ", explicou Maite Ferreiro, que engadiu "esta programación está pensada para o deleite das amantes do teatro e para facilitar un achegamento a esta arte por primeira vez, traendo a Lugo o mellor do teatro galego xunto cunha coidada selección de propostas premiadas en importantes festivais".

Día Mundial do Teatro

O día mundial do teatro celébrase cada ano no 27 de marzo desde o ano 1961, cando foi creado polo Instituto Internacional do Teatro. O principal obxectivo desta data é dar a coñecer o que representa o teatro para a cultura.

No ano 2023, a Asociación de Actores e Actrices de Galicia publica o seu manifesto polo Día Mundial do Teatro, que neste ano foi realizado pola actriz Clara Gayo, que reivindica as artes escénicas como arte que inclúe a diferenza, evidencia a inxustiza e acariña a nosa humanidade