Lugo, 15 de outubro de 2022. A concelleira de Cultura, Turismo e Promoción da Lingua, Maite Ferreiro, fixo balance dos datos de visitantes rexistrados polas instalacións turísticas municipais durante o San Froilán. Maite Ferreiro destacou “os bos datos de visitantes” rexistrados durante as festas, “o que se demostra coa satisfacción do sector da hostalería e a alta ocupación das prazas hoteleiras rexistrada”.

As instalacións turísticas municipais recibiron en total a visita de 11.133 visitantes, dos cales máis de 5.500 foron atendidos no posto de información turística da praza Maior, “un dos puntos máis importantes na información turística durante o verán e tamén durante as festas”, explicou Maite Ferreiro.

O Vello Cárcere foi a sala museística que recibiu máis visitas durante as festas, con 3.323 visitantes entre o 4 e o 12 de outubro, cun total de 4.590 visitantes rexistrados no conxunto das 5 salas museísticas.

No tocante á procedencia, Galiza e as zonas do estado próximas foron as zonas con máis turistas rexistradas, mais cun importante número de turistas procedentes do resto de países de Europa.