Lugo, 09 de xaneiro de 2023.  A concelleira de Cultura, Turismo e Promoción da Lingua, Maite Ferreiro, xunto co Tenente Alcalde, Rubén Arroxo, visitaron a nova intervención artística que se está a levar adiante dentro do proxecto de arte urbano Culturban. Pelúdez foi o protagonista da última intervención elaborada na praza Viana do Castelo pola gañadora do Combate Mural deste ano, Sandra López.

Maite Ferreiro explicou que desde a área de Cultura "seguimos a traballar en intervencións artísticas na rúa que convirtan a Lugo nun lugar vangardista, participativo e amable, dando un lugar en Lugo aos proxectos máis recoñecidos dentro do muralismo a nivel galego e estatal”.

Estas intervencións artísticas contan cunha selección de artistas locais que decorarán unha serie de cadros de luz ao longo da cidade.

Culturbán é mostra de arte na rúa, organizado e coordinado pola Área de Cultura do Concello de Lugo xunto a Espazo Lupa Arte que celebra a súa III edición. Desde a Tenencia de Alcaldía proponse un proxecto adicado a crear, producir e apoiar actividades relacionados coa arte urbana co obxectivo de propiciar e difundir as intervencións artísticas no espazo público, programando diversas actividades sobre arte e cultura en diferentes lugares e espazos da cidade de Lugo.