Lugo, 18 de xaneiro de 2021. O Tenente de Alcalde, Rubén Arroxo, participou xunto cos concelleiros Alexandre Penas e Cristina López e acompañados de persoal municipal nunha primeira xuntanza de coordinación entre as empresas concesionarias e as direccións de obra da peonalización de Quiroga Ballesteros e da reforma do soto da Praza de Abastos. Rubén Arroxo explicou que “o obxectivo destas xuntanzas é que ambas empresas traballen de maneira coordinada para levar a cabo ambas intervencións”.

“Estas xuntanzas continuarán durante a execución dos traballos para garantir en todo momento os accesos á praza e os espazos de carga e descarga, tratando de reducir as molestias ao mínimo para a veciñanza e os postos”, declarou Rubén Arroxo, que engadiu “cando ambas actuacións estén rematadas, a veciñanza de Lugo contará cunha Praza totalmente renovada, e cunha zona emblemática do centro de Lugo completamente humanizada”.

A rehabilitación do soto da Praza de Abastos contratouse por 586.625€, e un prazo de execución de 75 días. O proxecto inclúe a renovación de instalacións e servizos, como electricidade, auga, telecomunicacións e calefacción, ademais de mellorar a accesibilidade para persoas con mobilidade reducida.