“A LEI DE EMPRENDEDORES DO PP PERMITIU A GASOLINEIRA EN CARREFOUR, NOS APOSTAMOS POLA XENTE CON INICIATIVA” REMARCOU O CANDIDATO DO BNG-ASAMBLEAS ABERTAS

Apostar pola produción agro-gandeira sostible, o comercio de proximidade e os produtos locais será un dos eixos do programa do BNG-Asambleas Abertas para as eleccións municipais

O candidato do BNG-Asambleas Abertas visitou o Mercado da Terra que se celebra todos os martes no Mercado Municipal de Quiroga Ballesteros

Lugo, 3 de marzo 2015. O candidato do BNG – Asambleas Abertas, Rubén Arroxo, achegouse a coñecer o Mercado da Terra que se celebra todos os martes no Mercado Municipal de Quiroga Ballesteros. Arroxo, que acudiu acompañado dalgunhas das persoas que conforman a candidatura do BNG-Asambleas Abertas, e quixo coñecer os proxectos da decena de persoas que habitualmente comercializan os seus produtos a través desta iniciativa.

“Trátase de proxectos impulsados por persoas con iniciativa e coas cousas claras, estes son os verdadeiros emprededores e emprendedoras” dixo Rubén Arroxo que se referiu á necesidade de crear mecanismos, dende o concello, para “dar apoio a este tipo de mercados que achegan produtos naturais e de calidade sen intermediarios entre a persoa que os produce e a que os consume”. Arroxo dixo que “a lei de emprendedores do PP permitiu en Lugo a instalación dunha gasolineira no Carrefour pero non supuxo ningunha mellora para a xente que ten iniciativas sostibles e que apostan polo autoemprego no sector primario”.

Segundo Arroxo “o concello de Lugo ten un potencial moi importante para xerar este tipo de relación directa entre produtor e consumidor” e engadiu que “aquí temos a mostra de que é posible facer cousas innovadoras cos recursos propios”. Rubén Arroxo destacou o traballo realizado por todos os produtores que “nestes anos foron capaces de impulsar e manter este Mercado da Terra”. O candidato nacionalista destacou, tamén, “de facer do feito de mercar un acto político” en alusión “á necesidade de implicarse nun consumo consciente e comprometido”.

Rubén Arroxo afirmou que “está claro que para o concello de Lugo non supón ningún sacrificio económico dar apoio a iniciativas como o Mercado da Terra cando vemos como se despilfarran miles de euros en contratar empresas ou asistencias técnicas para facer traballos que perfectamente poderían facer traballadores municipais”. Para o BNG – Asambleas Abertas “hai que apostar por un novo xeito de facer políticas de fomento do emprego e de desenvolvemento local”. Rubén Arroxo apuntou que “nos o apoio a este tipo de iniciativas é algo fundamental”.