Maite Ferreiro dixo que “vemos como é habitual a utilización do escudo municipal franquista en documentos asinados pola alcaldesa, cando dende o ano 2012 existe outro escudo oficial”

A edil nacionalista sinalou que “o antigo escudo do concello foi aprobado durante a ditadura, para facer a Franco fillo predilecto da cidade, e nunca chegou a ser oficial”

Lugo, 22 de outubro 2015. O BNG – Asembleas Abertas pediu, a través da edil Maite Ferreiro, que “unha maior implicación do goberno municipal para a eliminación dos símbolos da época franquista neste concello”. Ferreiro lembrou que “en xullo de 2012 o consello da Xunta de Galiza aprobou definitivamente a bandeira e o escudo do concello que substituía ao que se viña utilizando dende a época franquista mais os antigos símbolos veñen sendo utilizados de xeito habitual en documentación asinada pola alcaldesa e responsables do goberno municipal”.

Maite Ferreiro dixo que “entendemos que dende o ano 2012 xa pasou un tempo prudencial para que se normalizase o uso do escudo oficial do concello e para que se fose renovando a papelería”. Para o BNG – Asambleas Abertas “trátase máis dunha cuestión de intención que de medios e compre romper esteticamente co pasado franquista”.

A edil nacionalista sinalou que “o antigo escudo do concello foi aprobado durante a ditadura, para concederlle distincións honoríficas ao ditador, e nunca chegou a ser oficial” e explicou “o concello de Lugo viña utilizando como escudo o aprobado polo Ministerio da Gobernación en 1957”. Este escudo da época franquista fora solicitado polo concello de Lugo no ano 1954 para crear unha medalla de honores que servise para condecorar a Franco. A continuación este mesmo escudo foi inserido na bandeira municipal e foi escudo do concello ata a aprobación definitiva do actual no ano 2012.