“O funcionamento dos servizos do Concello non poden depender dos intereses económicos das eléctricas” dixo Rubén Arroxo

Lugo, 29 de decembro de 2015. O portavoz municipal do BNG – Asembleas Abertas no concello de Lugo, Rubén Arroxo, pídelle ao goberno municipal contundencia coas eléctricas, ante unha situación que o concelleiro nacionalista definiu como moi grave “non se pode aceptar que as eléctricas corten a luz da piscina de Frigsa sen que haxa maior consecuencia”. O grupo nacionalista xa criticou o desmantelamento que estaban a sufrir os servizos electromecánicos do concello, presentando o pasado 30 de novembro unha bateria de preguntas á comisión municipal, mais consideran que as eléctricas non poden aproveitar esa situación en prexuizo das veciñas e veciños de Lugo “A veciñanza de Lugo paga dos seus petos as facturas a Endesa, polo que esta non pode cortar o subministro das instalacións que están a usar pola existencia de atrasos dende a institución” afirmou o portavoz nacionalista.

Dende o BNG-Asembleas Abertas critican tanto o abandono que tivo o goberno municipal cos servizos electromecánicos, como á lexislación estatal do PP que dificulta ás institucións públicas contratar persoal. Rubén Arroxo considera importante que se revisen a totalidade das facturas antes de abonar o seu importe, para o cal considera evidente que fai falla máis persoal dedicado a esa labor para podelo facer con máis axilidade “o que non podemos aceptar é que cos cartos de Lugo se puideran pagar facturas que estivesen sen revisar”