Rubén Arroxo dixo que “trataremos que a corporación se poña dacordo para reclamar ao goberno do estado a construción de carriles de incorporación”

O tramo da N-VI que vai dende a Avenida das Américas ata o enlace de Garabolos é unha das zonas con máis  tráfico rodado de toda a provincia de Lugo

Lugo, 2 de decembro de 2015. O voceiro municipal do BNG – Asembleas Abertas no concello de Lugo anunciou que presentarán unha inciativa dirixida ao pleno para solicitar ao goberno central as melloras necesarias para garantir a seguridade no tramo da N-VI entre a Avenida das Américas e Garabolos, executando carrís de incorporación e iniciando o estudo para o seu desdobramento.

Arroxo lembrou que o tramo da N-VI que vai dende a Avenida das Américas ata o enlace de Garabolos é unha das zonas con máis  tráfico rodado de toda a provincia de Lugo e explicou que “serve de circunvalación do núcleo urbano e comunica o polígono industrial do Ceao en grande parte da cidade e outras conexións por estrada”. Ademais da existencia dun centro escolar na zona, coa apertura do centro comercial de Abella incrementouse significativamente a saída de vehículos cara a N-VI dende estas incorporacións, elevando por tanto os riscos existentes.

“Hai que lembrar que xa houbo accidentes de gravidade neste trazado, que cunhas solucións que suporían un gasto relativamente pequeno, dada a importancia e o uso de dita infraestrutura, se poderían evitar” afirmou Rubén Arroxo. En novembro do 2014 o BNG presentou unha Proposición non de Lei no Congreso dos Deputados, solicitando o desdobramento deste tramo de estrada e adaptando os accesos á seguridade que se precise, mais a día de hoxe isto está paralizado.