Paz Abraira afirmou que “é, polo menos cuestionable, a actuación do PSOE tanto no caso da venda das accións do Lugo como no caso da cesión do Edificio do Hospital de San Xos锠

Agora o BNG quere saber que vai suceder coa subvención que o CD Lugo ten concedida polo concello de Lugo para o ano 2015 e cos orzamentos participativos municipais 

Lugo, 13 de xaneiro de 2015. A voceira do BNG no concello de Lugo, Paz Abraira, criticou “o entreguismo” das institucións púlblicas lucenses aos intereses privados. Abraira referiuse, neste caso, á modificación que se vai facer das bases do concurso público de venta de accións da SAD do CD Lugo para adaptalas ás esixencias do suposto comprador. A voceira do BNG fixo alusión, tamén, ao procedemento de cesión do Hospital de San Xosé por parte da Deputación de Lugo.

Para o BNG “non é normal que as institución púlblicas se poñan ao servizo dunha SAD Deportiva e ao servizo de intereses privados”. Abraira lembrou que “tanto o concello de Lugo como a deputación utilizaban como garantía para a recuperación dos cartos gastados nas accións da SAD do CD Lugo o importe das subvencións nominativas que estas entidades conceden anualmente á entidade deportiva” e engadiu que “agora os cartos non se recuperarán de xeito inmediato e non sabemos que cal vai ser o criterio do Concello á hora da concesión da subvención nominativa ao CD Lugo neste ano 2015 de non facerse efectivo este ano o cobro da totalidade das accións”.

Abraira lembrou, tamén, que o goberno municipal socialista “anunciou a bombo e platillo que adicaría unha parte importante dos cartos procedentes da venda das accións” e preguntou “como lle afecta a paralización do proceso de venda de accións do CD Lugo á partida de Investimentos dos orzamentos destinada a Orzamentos Participativos?”. Para o BNG está claro que “este é o concepto que o PSOE ten dos orzamentos participativos, aínda non pasou un mes dende a aprobación dos orzamentos e xa quedaron sen fondos para a súa medida estrela para o 2015”.

Para o BNG “compre que as institucións públicas aposten polo apoio ao deporte de base e non pode ser que sexan utilizadas como intermediarias-prestamistas para o mercadeo de accións de Sociedades Anónimas Deportivas propietarias de clubes deportivos de elite”. Os nacionalistas puntualizaron que “tanto no caso das accións do Lugo como na cesión do Edificio do Hospital de San Xosé as bases dos concursos públicos parecen feitas á medida para alguén concreto”.