Xosé Lois González Souto, “Pereira”, denuncia que nos orzamentos aprobados para 2013 aparecen consignadas obras que non se van realizar e que se anularán este venres nun pleno extraordinario

 Pereira critica a inoperancia dun goberno do PP que en dedicacións exclusivas aos seus concelleiros leva cobrado 275.000 euros sen demostrar co se goberno seren útiles para os veciños e veciñas de Guitiriz

Guitiriz, 17 de outubro de 2013. Xosé Lois González Souto, “Pereira”, portavoz do BNG de Guitiriz denuncia publicamente que o goberno do PP mentiu e  enganou a todas as veciñas e veciños do Concello no Pleno do 1 de agosto onde se aprobaron os orzamentos para este ano 2013 cos votos do PP e a “cuña” do concelleiro independente e no que presentaban no capítulo de investimentos tres obras: urbanización da rúa Os Vales por 89.763,93 euros dos cales 22.440,99 euros eran aportados polo Concello e 67.322,94 pola Xunta; soterramento LMT da rúa Boa Veciña e praza do Campo da Feira por una inversión de 92.713,91 euros, sendo 18.542,79 euros achegados polo Concello e 74.171,12 euros pola Xunta e, finalmente, a renovación da instalación e iluminación exterior en Parga e Pardiñas cun investimento de 49.937,17 euros,  dos cales eran o Concello achegaba 14.981,16 euros e a Xunta de Galiza 34.956,01 euros.

O BNG denuncia a pouca seriedade que ten o Sr. Teixido e o seu goberno aprobando en Pleno investimentos non reais,  baleiros de contido e sen

fundamento real ningún xa que, como se comprobou agora, nunca se chegarán a executar, xa que este vindeiro venres no Pleno extraordinario que programou o PP, procederán a eliminar estas obras ao ficar o Concello sen subvención algunha por parte da Xunta de Galiza, e dedicarán o diñeiro con que participaba o Concello nestas obras, que fai un montante de 55.964,94 euros a reparacións viarias (bacheos 47.000 euros), axudas de material escolar (6.000 euros)  e acondicionamento de locais (2.964,93 euros).

Do mesmo xeito o portavoz do BNG lembrou que estas eran as primeiras e únicas obras serias que este goberno planificaba realizar dende a súa chegada ao poder hai dous anos e medio. Isto é moi criticábel tendo en conta ademais que o goberno municipal de Guitiriz conta con catro dedicacións de concelleiros con salario que levan embolsado aproximadamente 275.000 euros sen demostrar que fixeran nada útil para as veciñas e veciños de Guitiriz.