Os nacionalistas presentaron unha serie de alegacións á actual proposta de modificación puntal do PEPRI que afecta a esta zona e que na actualidade en período de exposición pública

“A proposta prevé a construción de dous edificios cun volume moi importante que poden ter un impacto visual moi forte sobre a muralla” dixo Paz Abraira 

A nacionalista lamentou que no momento da elaboración do PEPRI non se protexeran as vivendas existentes como solicitara o BNG 

Lugo, 08 de agosto 2014. O Bloque Nacionalista Galego presentou unha serie de alegacións á proposta de modificación puntual do PEPRI  que comprende o espazo situado na confluencia da Ronda da Muralla e a Rúa San Roque. O documento que recolle esta modificación do PEPRI está en período de exposición pública. A voceira nacionalista no Concello de Lugo, Paz Abraira, dixo que “a proposta prevé a construción de dous edificios cun volume moi importante e poden ter un impacto visual moi forte sobre o propio monumento”. Por este motivo o Bloque Nacionalista Galego presentou unha serie de alegacións encamiñadas a mellorar esta proposta e encamiñadas a protexer a muralla de Lugo.

Paz Abraira lembrou que un dos motivos da abstención do seu grupo político na aprobación do PEPRI foi “que non se protexeran as vivendas deste cuarterón, sobre o que o Concello acaba de facer a modificación puntal”. Así, a edil afirmou que “para o BNG foi desde logo unha perda importantísima que non se protexese as vivendas existentes moi propias da tipoloxía do entorno que poñían ademais en valor o propio monumento”. Mentres que a nova proposta urbanística ten un capacidade edificatoria moi superior a que existía antes da aprobación do PEPRI.

A proposta actual contempla dous bloque de edificación de distintas alturas no fronte á Ronda da Muralla e na frontal cara a rúa San Roque. No Caso da Ronda da Muralla o efecto visual desde o propio monumento e desde a calzada vai ser moi impactante, sobre todo se existe unha total uniformidade estética. Ademais, outra das características destacables é que o novo edificio proposto na Ronda da Muralla adiántase moito con respecto aos xa existentes, polo que non se lle dá continuidade a non ser a través da zona porticada ao espazo libre existente no comezo da Rúa Montero Ríos. O feito de adiantar tanto a edificación e a zona porticada pode xenerar un efecto visual de túnel que en nada vai favorecer ao entorno.

As alegacións do BNG vai encamiñadas a que se retranquee a construción da Ronda mantendo unha liña edificatoria máis equilibrada coa dos edificios xa existentes, co que se ganará en distancia con respecto á Muralla e se limitará o efecto visual de túnel ou barreira que se pode crear. Os nacionalistas tamén solicitan que se deseñe unha fachada que non xenere efecto visual de túnel ou muralla paralela e que se incremente o fondo edificatorio aínda que teña maior altura porque, desta maneira, pode retrasarse a liña edificatoria e ganar distancia con respecto ao monumento.