Maite Ferreiro lamentou que “non se considere o noso idioma e que o goberno municipal non vele pola aplicación da ordenanza municipal, aprobada por unanimidade, que regula o uso do galego”

O BNG – Asembleas Abertas reclamaralle ao goberno municipal e á empresa concesionaria que corrixa esta situación tras recibir queixas de persoas usuarias

Lugo, 19 de febreiro de 2016. A edil do BNG – Asembleas Abertas, Maite Ferreiro, denunciou hoxe que as novas máquinas de cobro dos parkings soterrados de Lugo non teñen idioma galego “a pesares de ter tres idiomas para o seu funcionamento ningún deles é o galego”. Maite Ferreiro lamentou que “non se considere o noso idioma e que o goberno municipal non vele pola aplicación da ordenanza municipal, aprobada por unanimidade, que regula o uso do galego”

Maite Ferreiro explicou que os aparcadoiros soterrados da praza do Ferrol, Santo Domingo e a praza da Constitución son de propiedade municipal a pesares de estar xestionados por unha empresa concesionaria e sinalou que “o concello de Lugo ten unha ordenanza de uso do galego que fora aprobada unanimemente por todos os grupos políticos con representación no pleno”. O BNG – Asembleas Abertas reclamaralle ao goberno municipal e á empresa concesionaria que corrixa esta situación.

“Recibimos queixas de varias persoas e por iso denunciamos esta situación que nos parece paradóxica” dixo Maite Ferreiro e engadiu que “pódese pagar en Inglés, Francés ou Español pero non en galego cando en realidade a maioría dos pagos facémolos as galegas e os galegos”.