O Candidato do BNG-Asambleas Abertas dixo que “nós defendemos un uso socio-sanitario para estas instalacións, o PP, dependendo que fale, está entre a comisaría ou a especulación inmobiliaria”

Rubén Arroxo sinalou que “esta zona da cidade precisa, claramente, dun P.A.C. para mellorar as prestacións sanitarias”

Lugo, 20 de abril 2015. Rubén Arroxo visitou o barrio da Residencia acompañado de membros da candidatura do BNG-Asambleas Abertas. Nesta visita Arroxo afirmou que “Jaime Castiñeira escapou á outra punta da cidade para presentar a súa candidatura pero neste barrio é onde está unha das súas maiores vergonzas”. Arroxo lembrou que o BNG sempre apoiou todas as reivindicacións veciñais para este barrio e “mantivemos unha postura firme e coherente”.

Arroxo dixo que “nos utilizaremos o concello como ferramenta para defender ás persoas e os intereses de Lugo” e engadiu que “ás políticas do BNG nas institucións son para defender á xente”. En referencia á situación de abandono do edificio da residencia, Arroxo dixo que “as nosas propostas para este edificio son claras” e apuntou que “esta zona da cidade precisa, claramente, dun P.A.C. para mellorar as prestacións sanitarias dos veciños e veciñas”. Arroxo dixo que “Lugo precisa de centros públicos para atender ás persoas maiores e este edificio podería albergar, perfectamente, unha destas instalacións”.

O candidato do BNG-Asambleas Abertas dixo que “o PP nunca quixo facer nada por este edificio nin por este barrio e o máis clarificador que escoitamos foron as últimas declaracións da conselleira de sanidade que apuntan ao que realmente pode ser a súa intención”. Arroxo dixo que “nós defendemos e seguimos defendendo un uso socio-sanitario para estas instalacións, o PP, dependendo que fale, está entre a comisaría ou a especulación inmobiliaria”.