Arroxo sinalou que “fai catro anos faciamos esta mesma reclamación a un goberno do PSOE, agora está o PP e a situación é exactamente a mesma con calquera dos dous”

Maite Ferreiro e Rubén Arroxo visitaron as instalacións da estación de Lugo coa Deputada do BNG no congreso Rosana Pérez

Lugo, 18 de abril de 2015. O candidato do BNG – AA, Rubén Arroxo, e a número dous da candidatura, Maite Ferreiro, visitaron a estación do ferrocarril de Lugo acompañados da Deputada do BNG no congreso dos Deputados, Rosana Pérez. O candidato nacionalista á alcaldía de Lugo, Rubén Arroxo, dixo que “asistimos a o desmantelamente progresivo dun servizo necesario para a xente” e sinalou que “fai catro anos faciamos esta mesma reclamación a un goberno do PSOE, agora está o PP e a situación é exactamente a mesma con calquera dos dous”. Arroxo dixo que “non imos facer ningún paripé de recollida das nosas propias sinaturas por que a postura do BNG é clara e coherente e non depende de quen goberne en Madrid como lle ocurre ao candidato Orozco”.

O candidato á alcaldía de Lugo afirmou que “o debate sobre o ferrocarril para a provincia de Lugo non é só o da chegada do AVE, senón tamén o dos servizos de proximidade”. Por iso, insistiu, “é preciso que a batalla do tren en Lugo non sexa só un debate de infraestruturas, senón tamén de servizos” e indicou que “a provincia ten as características apropiadas para que funcione un tren de cercanías con Láncara, Sarria, Monforte, Guitiriz, Rábade”.

Para Rubén Arroxo “reivindicamos o tren de cercanías e a mellora dos servizos e a conexión ferroviaria do interior de Galiza” e engadiu que “a nosa é unha aposta polo tren e polas comarcas do interior”, afirmou Rubén Arroxo, que destacou a capacidade do ferrocarril para a “vertebración da provincia”. Arroxo exemplificou o abandono das infraestruturas ferroviarias en Galiza comparando unha viaxe entre Lugo e Ourense, distantes tan só 100 quilómetros, dura o mesmo tempo, que o traxecto en AVE entre Madrid e Valencia, que distan 400 quilómetros.

Rosana Pérez lembrou que o BNG ten presentadas numerosas iniciativas no Congreso dos Deputados “tanto cando os ministros de fomento eran do PSOE como agora que son do PP e a situación de desmantelamento do ferrocarril en Galiza non mudou por que ámbolos dous partidos teñen un visión centralista que non lles permite ver as necesidades concretas das galegas e galegos”. Pérez demandou “a necesidade de servizos de cercanías” e tamén de máis frecuencias e conexións tanto con Madrid e Barcelona como co resto de cidades galegas.