O BNG foi a única forza política que presentou formalmente unha proposta para investir os remanentes do concello de Lugo

“PP e PSOE escenifican un pacto oscuro para sacarse de enriba os problemas dos remanentes e do PXOM” afirmou Paz Abraira

Lugo, 25 de abril, 2014. A voceira do BNG no concello de Lugo, Paz Abraira, acusou hoxe a PP e PSOE de pechar un pacto oscuro, no concello de Lugo, sen luz e taquígrafos e de costas aos lucenses. Abraira afirmou que o “o BNG foi a única forza que remitiu unha proposta a través do rexistro do concello aos outros grupos” e por iso “o BNG vai defender a súa proposta de remanentes, a única que vai chegar legalmente as comisión do pleno e que a fixemos integramente pública xa que os termos do acordo entre PP e PSOE son descoñecidos”.

Paz Abraira dixo que “o pacto serviralles para sacarse de enriba dous grandes problemas” e explicou que “o PSOE aprobará as obras dos remanentes e o PP aprobará definitivamente o plan xeral que acordara co PSOE e que lle está a ter moitos custos políticos”. A escenificación do acordo, que vai beneficiar ás dúas forzas, supón a evolución dun modelo vivo como o que xa se deu no concello de Vigo e que “é a plasmación dunha chamada que, a nivel estatal están a facer os dous grandes partidos”. Abraira dixo que “será esta situación, que se da hoxe en Lugo e se deu en Vigo, a que se dará en Coruña, Santiago e Ourense”. O BNG segue esixindo a dimisión do alcalde e de todos os cargos imputados por corrupción, cousa que non fan PP nin PSOE que agora chegan a acordos.

Os medios de comunicación xa apuntaban a posibilidade que este acordo entre PP e PSOE pode ser unha posibilidade de poder acordar os orzamentos de 2014 o que significa que é o comenzo do apoio mútuo entre os dous partidos tocados pola corrupción. Paz Abraira dixo que “non saberemos o que se oculta detras dese acordo” máis sabemos que a motivación “para o comenzo deste goberno oculto entre PP e PSOE son 13 millóns de euros de remanentes unha cantidade máis que importante para que se poñan dacordo”.

A voceira nacionalista avanzou que con este acordo “PP e PSOE daranse un lavado de cara coas partidas de caracter social” pero “a realidade demostrarará que son poucas as partidas que se destinan a algo distinto a manter as empresas da construcción”. Abraira dixo que en Lugo hai outras moitas empresas que non son da construción que tamén necesitan de partidas económicas como propoñia o BNG no seu plan económico. Ademais para o BNG supón “un clamor a falta de capacidade para atender ás persoas que máis o necesitan dende os servizos sociais” xa que “PP e PSOE tiñan 13 millóns para atender, dende os servizos sociais, a moitas persoas que o están pasando realmente mal en Lugo”.

Saneamento de Pías

Paz Abraira informou que o saneamento de Pías xa está funcionando, leva unha semana bombeando as augas pluviais, pero non se lles comunicou aos veciños e veciñas que levan máis dun ano agardando, e coas taxas pagadas, para poder conectarse á rede de saneamento. “Esto demostra, unha vez máis, cales son as prioridades do goberno de Orozco que nin se ocuparon de avisar a veciños e veciñas” sentenciou Paz Abraira.