Para o candidato do BNG Asambleas – Abertas “non é normal que por problemas burocráticos demos as costas a unha realidade como é a utilización das pistas deportivas dos centros escolares durante as fins de semana e as vacacións”

Arroxo lembrou que “son as únicas instalacións deportivas existentes nalgúns barrios”

Lugo, 3 de maio 2015. Abrir as pistas polideportivas dos centros escolares durante as fins de semana e fora do horario lectivo é unha das propostas que se incluirán no programa do BNG – Asambleas Abertas. Rubén Arroxo dixo que “é unha maneira de fomentar o deporte de barrio” e engadiu “hai moitos barrios da cidade que non teñen ningunha instalación deportiva”. Arroxo puxo como exemplo a zona de Lamas de Prado onde hai tres centros escolares e ningunha outra instalación deportiva.

Arroxo, acompañado da triatleta Alba Cuba, que ocupa o número 20 da candidatura do BNG – Asambleas Abertas, e do responsable local de Galiza Nova, achegáronse a un centro escolar para facer unha apertura simbólica. “Temos que ser a xente máis nova quen demos pasos para cambiar as cousas e plantexemos alternativas para que Lugo funcione, non podemos limitarnos unicamente a emigrar” afirmou Rubén Arroxo.

Rubén Arroxo sinalou que “non é normal que por problemas burocráticos demos as costas a unha realidade como é a utilización das pistas deportivas dos centros escolares durante as fins de semana e as vacacións”. Neste momento xa son moitos os mozos e mozas que acceden ao interior dos recintos escolares para facer deporte en horario non lectivo “e esto é unha realidade” concluíu Arroxo que sinalou “somentes hai que regular e darlle forma para evitar problemas”.

“Estableceremos un mecanismo de solicitude do uso da instalación a través do correo electrónico, facebook ou whatsapp” dixo Arroxo que explicou “evidentemente non se trata de que os recintos escolares permanezan abertos sen control”. Para BNG – Asambleas Abertas trátase, simplemente, de facer unha boa xestión das instalacións públicas. “Somos conscentes de que esta idea xa foi proposta con anterioridade pero o actual goberno non foi capaz de facela funcionar, nos antepoñemos as persoas á burocracia e por iso faremos que funcione” finalizou Arroxo.