Lugo, 23 de xaneiro de 2024. O Tenente Alcalde e concelleiro de Mobilidade e Infraestruturas, Rubén Arroxo, anunciou a continuación do plan de calmado de tráfico na cidade con 4 novas intervencións. "Buscamos un tráfico calmado, aumentando a seguridade da veciñanza de toda a cidade", afirmou Rubén Arroxo, que destacou "a importancia das actuacións de calmado de tráfico, comezando nas zonas escolares nun primeiro momento e que se expandiron a todas as zonas da cidade".

Nesta intervención realizarase un novo paso de peóns elevado na Rolda das Fontiñas, á altura do número 29, no primeiro paso de peóns tras a rotonda de San Eufrasio. Ademais, construiranse tamén nas rúas Mazaira, á altura do número 12, Curros Enríquez 11 e Afonso X o Sabio á altura da facultade de Ciencias.

Segundo o Tenente Alcalde, "o calmado do tráfico é unha das reclamacións que máis nos fan chegar as veciñas e veciños de Lugo". Rubén Arroxo afirmou que "desde a Tenencia de Alcaldía seguimos a traballar para que Lugo se convirta nunha cidade na que as persoas sexan o centro da mobilidade, cun tráfico calmado e menos vehículos a motor nas rúas".