Lugo, 09 de decembro de 2022.- O Bloque Nacionalista Galego súmase ás mobilizacións convocadas pola coordinadora Eólica Así Non no Día Mundial das Montañas, o próximo domingo 11 de decembro.

En Lugo contará cunha marcha en San Xoán do Alto ás 9 horas e unha concentración diante do edificio administrativo da Xunta de Galiza ás 12 horas.

Esta mobilización enmárcase dentro dos diferentes actos e accións reivindicativas que se desenvolveran na xornada do domingo por toda Galiza para defender un desenvolvemento da enerxía eólica de forma xusta co territorio.

A deputada do BNG por Lugo no Parlamento galego, Carme Aira declarou “Galiza precisa dun desenvolvemento xusto da enerxía eólica, que garanta os dereitos das persoas que viven e traballan no rural, mais tamén que os recursos enerxéticos se poñan ao servizo da sociedade, e non da especulación das enerxéticas”

Neste senso, Aira fixo fincapé na necesidade de poñer ferramentas para a produción enerxética en favor da maioría social “Galiza é das maiores produtoras do Estado, por isto tamén é básico para o País contar cunha tarifa eléctrica galega que poña estes recursos en máns das galegas e galegos, e así baixar o recibo da luz, e non en mans das grandes empresas”

Asemade, a deputada animou a participar á veciñanza para frear a especulación e o espolio enerxético “outro modelo enerxético é necesario e é posíbel, a alternativa é un modelo participativo e que os beneficios retornen en nós, e non nos petos de catro multinacionais, por isto animo a toda á veciñanza a participar nas mobilizacións convocadas por Eólica Así Non”