No acto participaron as candidatas de As Nogais, Helena Santín e de Becerreá, Sabela Pérez, e os candidatos de Baralla, Xosé Manuel Becerra e de Navia de Suarna, Roberto Carballo

Unha aposta pola revitalización dos concellos da montaña foi a aposta unánime dos alcaldables do BNG – Asambleas Abertas

Lugo, 3 de maio 2015. Nun acto aberto no concello de Becerreá presentáronse as persoas que encabezan as candidaturas do BNG – Asambleas Abertas nos concellos de As Nogais, Baralla, Becerreá e Navia de Suarna. No acto participou, tamén, o parlamentario do BNG, Cosme Pombo. Unha aporta pola revitalización dos concellos da montaña foi a aposta unánime das candidatas de As Nogais, Helena Santín e de Becerreá, Sabela Pérez, e dos candidatos de Baralla, Xosé Manuel Becerra e de Navia de Suarna, Roberto Carballo.

Mocidade e renovación son as características máis salientables das candidaturas presentadas nas que únicamente o candidato de Baralla ten experiencias similares en pasados comicios. Tanto as candidatas de As Nogais e Becerreá, como o candidato de Navia de Suarna, preséntanse como candidatos a alcaldía por primeira vez.

Todos os candidatos e candidatas coincidiron na necesidade de implementar políticas que redunden na creación de emprego e na potenciacións dos valores endóxenos da zona para asentar poboación e evitar a sangría demográfica que están a sufrir os concellos da zona. Apostar pola promoción do turismo e a posta en valor dos recursos agro-gandeiros serán unha das apostas dos nacionalistas en caso de chegar aos gobernos municipais.

Dende as candidaturas do BNG – Asambleas Abertas sinalaron que “hai que cambiar as políticas postas en práctica por PP e PSOE nos nosos concellos, cambiando as políticas caciquiles e clientelares por transparencia e dereitos para os veciños e veciñas” . Para os nacionalistas “compre aplicar medidas para que a mocidade quede nos nosos concellos e evitar que sigan marchando cun futuro incerto mentres se perden os recursos que o noso entorno nos ofrece”.