Lugo, 20 de marzo de 2025 A deputada do BNG no Parlamento de Galiza Olalla Rodil e a concelleira de Educación en Lugo, Iria Buíde, mantiveron unha xuntanza con representantes da FAPACEL para ver a necesidade de ter un novo mapa escolar na cidade de Lugo.

Dende a FAPACEL denuncian a situación que se vai dar no IES S. XILLAO pola a falta de prazas suficientes para atender a demanda de estudantes procedentes dos centros de primaria adscritos a el por zona: CEIP As Mercedes, CEIP Sagrado Corazón, CEIP As Gándaras, CEIP Illa Verde , IES San Xillao e O Corgo.

Esta falta de prazas fixo evidente que as tres liñas coas que foi orixinalmente concibido este centro non son suficientes para atender a demanda existente, así no curso 2023/2024 incrementouse unha liña máis no curso de 1º da ESO e no 2024/2025 ofertáronse cinco.

A isto temos que sumarlle que este IES é o un dos tres da provincia que conta con Bacharelato de Artes, co cal aumenta o número de alumnado pero o espazo que neste centro existe segue sendo o mesmo.

Dende o BNG levamos unha batería de iniciativas ao Parlamento Galego nas que solicitamos que se amplíen as liñas de 1º da ESO do IES San Xillao para garantir as prazas suficientes tendo en conta a demanda de estudantes dos centros adscritos a el.

"Dende o BNG xunto coa FAPACEL tamén pedimos que se faga unha revisión da zonificación da cidade, un mapa escolar que ten máis de 25 anos e que non se adecúa á realidade demográfica nin urbanística da cidade a día de hoxe" explica Olalla Rodil.

Denunciamos a falta de previsión que se tivo dende a Xunta de Galiza pois evidentemente este non é un problema xerado de un día para outro senón que é unha situación que a pouco que se analizara a situación demográfica da cidade de Lugo se podía ter resolto con tempo" conclúe Rodil