Lugo, 20 de marzo de 2025. O Tenente Alcalde do Concello de Lugo, Rubén Arroxo, e a concelleira de Cultura, Turismo e Promoción da Lingua, Maite Ferreiro, visitaron unha das Casas das Linguas municipais coincidindo coa Semana Internacional da Francofonía 2025. Dende alí, Ferreiro salientou o papel destas instalacións en datas coma esta, destacando o seu papel como referentes na aprendizaxe e na promoción de idiomas de todo o mundo.

"As Casas das Linguas son espazos fundamentais para o fomento do plurilingüismo en Lugo, onde se ofrece formación en distintas linguas ao longo de todo o ano. Hoxe é o día de celebrar a francofonía como unha oportunidade para poñer en valor a diversidade lingüística e cultural de Francia e de todos os territorios de fala francesa", explicou a concelleira.

As Casas das Linguas do Concello de Lugo acollen formación en idiomas como galego, portugués, inglés, francés, alemán e linguaxe de signos durante todo o curso, proporcionando recursos e apoio para quen queira ampliar os seus coñecementos lingüísticos. "A aprendizaxe de linguas abre portas tanto a nivel persoal como profesional, e desde a Área de Cultura, Turismo e Promoción da Lingua seguimos apostando por facilitar o acceso de toda a cidadanía a estes cursos", insistiu Maite Ferreiro.

Na Semana Internacional da Francofonía, Lugo reivindica a importancia do francés como unha lingua con presenza global e con fortes vínculos culturais e históricos. "O coñecemento de diversos idiomas é unha riqueza que debemos seguir promovendo, e as Casas das Linguas son unha ferramenta clave nese labor", concluíu Ferreiro.