Lugo, 20 de marzo  de 2025. O BNG de Lugo convida á veciñanza a unirse á mobilización convocada para este sábado na Pobra do Caramiñal, en rexeitamento á implantación da macrocelulosa de Altri. O portavoz do BNG, Rubén Arroxo, destacou a importancia desta mobilización "unha vez coñecidos os informes favorables da Xunta de Galiza para este proxecto". O BNG continúa, segundo explicou Rubén Arroxo, "traballando desde as rúas e as institucións para frear un proxecto que será lesivo para Galiza e tamén para Lugo, dado que a contaminación da planta chegará ata a cidade", e engadiu "implantación da macrocelulosa de Altri non só afectará negativamente ao medio ambiente, senón que tamén comprometerá o futuro económico e social de todo o País."

Para facilitar a participación das e dos lucenses, haberá un servizo de bus para acudir á Pobra, que partirá desde o Edificio Sindical de Lugo ás 9:00 horas deste sábado, 22 de marzo. O BNG reiterou con esta acción o seu apoio ás mobilizacións contra este proxecto,  que conta cunha forte oposición social na Galiza, tanto por parte da veciñanza como de colectivos ecoloxistas e do sector primario galego. Desde o primeiro momento, O BNG deixou clara a súa frontal oposición á implantación desta industria, que supón un grave risco para os recursos naturais, especialmente a auga, ademais de poñer en perigo o modelo económico sustentábel e ligado ao territorio que defende o BNG.

O BNG continúa a traballar nas institucións, presentando diversas iniciativas tanto no Parlamento Galego, no Congreso e no Senado, no Parlamento Europeo e en deputacións e Concellos para reclamar transparencia no proceso e demandar que se escoite a voz das veciñas e veciños que rexeitan de maneira maioritaria este proxecto. "Defendemos dun modelo produtivo respectuoso co medio e que priorice os sectores estratéxicos galegos, no canto de favorecer proxectos especulativos que comprometen o futuro do noso País" destacou Arroxo.