Lugo, 22 de maio de 2024. O portavoz do BNG e Tenente Alcalde do Concello de Lugo, Rubén Arroxo, anunciou que o BNG presentará unha proposición ao vindeiro pleno municipal ante a urxencia de medidas para rematar coa precariedade, o abuso da contratación a tempo parcial e coa temporalidade en todos os sectores. A iniciativa parte da proposta achegada pola CIG dentro da súa campaña STOP PRECARIEDADE, TRABALLO DIGNO.

"Dous anos despois da aprobación da última reforma laboral confírmouse o que xa viñamos denunciando que sucedería, con novas modalidades de contratación polas que se multiplica a precariedade e cuxo resultado é unha clase traballadora empobrecida sen os ingresos necesarios para vivir dignamente e poder acceder a dereitos básicos como alimentación e vivenda, especialmente no caso da mocidade", explica Rubén Arroxo.

Deste xeito, cómpre facer realidade un piar básico do Marco Galego de Relacións Laborais e poder exercer o dereito a decidir e negociar en Galiza as nosas propias condicións de traballo, polo que "se reclamará Goberno galego á urxente aprobación dun Plan galego de recuperación económica, industrialización, creación de emprego digno e servizos públicos na nosa terra", insiste o seu portavoz.

Ademais, tamén se lle demandará ao Goberno español a derrogación da reforma laboral de 2012 e aprobar un cambio radical na reforma de 2021 para a creación de emprego digno e con dereitos e aprobación dunha nova lexislación laboral e social que restitúa os dereitos perdidos.

A proposta considera fundamental instar aos Gobernos español e galego a "reducir a xornada laboral semanal ás 35 horas para avanzar na aplicación da xornada de catro días a 32 horas á semana, xa que os avances tecnolóxicos e os cambios na organización do traballo permiten facelo para xerar máis riqueza social", explica Rubén Arroxo.

Así mesmo, reclama aos Gobernos un acordo para "completar as transferencias das competencias pendentes á Galiza, para poder exercer todas as funcións en materia de lexislación e xestión do traballo, o emprego, formación e recoñecemento de prestacións", conclúe o portavoz do BNG.