“Non son de recibo nin os retrasos nin as confusións interesadas sobre estas obras” dixo o parlamentario do BNG por Lugo

Lugo, 27 de febreiro de 2014. O parlamentario do BNG, Cosme Pombo, presentou unha serie de preguntas dirixidas á Consellería de Medio Ambiente, Territorio e Infraestruturas sobre o plan de execución das obras pendentes do Plan Paradai. Pombo preguntou, directamente, se a consellería acometerá, con estas obras, o entronque da nova Ponte de Paradai coa Glorieta de Carlos Azcárraga. Para o BNG, e despois da xuntanza da comisión de seguimento do Plan Paradai, non está nada claro que a Xunta teña previsto acometer esta parte fundamental das obras.

Cosme Pombo lembrou que neste mes de febreiro, a consellería anunciou que “as obras da Ponte Paradai estarán finalizadas este mesmo ano” e que o proxecto contempla a construción dunha ponte nova sobre o ferrocarril e a conexión coa estrada das Gándaras (glorieta Serra de Meira). Mais, engadiu Cosme Pombo, “nada se di sobre o entronque desta ponte coa rotonda que une Carlos Azcárraga coa actual ponte sobre a vía do ferrocarril”.

A consellería de retomou as obras da Ponte de Paradai (Lugo) no mes de outubro, despois dunha importante demora das mesmas, pero os traballos pouco duraron, a maquinaria foi retirada da zona e a veciñanza afectada manifestou a súa indignación diante da confusión creada e ante o continuado retraso das obras. Cosme Pombo afirmou que “a indignación foi xerada polas continuas liortas entre Xunta e Concello que impiden a execución dunhas obras polas que se levan moitos anos agardando”.

Os nacionalistas preguntaron, tamén, se o Goberno galego dispón dalgún estudo, plan ou proposta que contemple a execución do Plan Paradai na súa totalidade e cal é o cronograma que manexa a Xunta de Galiza para a execución total das obras da Ponte de Paradai. Pombo sinalou que “consideramos que non son de recibo nin os retrasos nin as confusións interesadas sobre estas obras” e engadiu que “o BNG comparte a indignación do vecindario que se senten burlados por un goberno que debería ter estas obras xa rematadas”.