Lugo, 21 de febreiro de 2017. Varias persoas puxéronse en contacto co voceiro do BNG-AA, Rubén Arroxo, para reclamar unha solución para o tránsito de persoas na confluencia da ronda do Carme coa Av. República Arxentina e coa rúa Santiago. “Parece que sodes os únicos que vos preocupades polas persoas que camiñamos” dixo unha das veciñas que lle trasladou a súa indignación ao voceiro do BNG-AA pola dificultade que lle supón chegar dende a beirarrúa da Av. República Arxentina ao paso de cebra da rúa Santiago.

Rubén Arroxo sinalou que “hai que dar unha solución a curto plazo para facilitar o paso, pero o BNG-AA tamén propón unha solución máis a longo prazo para que, con parte dos fondos EDUSI, se conecten as costas do parque de Rosalía de Castro con parque de Marcos Cela a través dunha pasarela”. Para o BNG-AA trátase de “unir dúas zonas verdes da cidade e dar unha solución á conexión da cidade co río”.

A pesares de que están ben sinalizados, en canto a sinalización horizontal, vertical e tamén semafórica, os pasos de peóns desta intersección convértense nun auténtico labirinto pola falta de conexión entre eles e coas beirarrúas. O paso de peóns que permite o cruce da Av. da República Arxentina vese interrompido pola mediana que non ten solución para que as persoas transiten coa debida seguridade.

Dende o BNG-AA solicitaraselle ao goberno municipal que tome as medidas precisas para garantir un tránsito como e seguro para as persoas nesta zona. “Cruzar camiñando na intersección da Av. República Arxentina coa rúa Santiago é unha odisea” dixo Arroxo que se achegou a este punto para comprobar en persoa a dificultade que supón cruzar a Av. República Arxentina dende o Palacio de Deportes ata a rúa Santiago.