Lugo, 04 de outubro de 2024. O San Froilán 2024 comezou cunha intensa tarde de actividades no centro de Lugo, co desfile do gando e o pregón das festas a cargo da artista multidisciplinar Luz Darriba. Rubén Arroxo, Tenente Alcalde do Concello de Lugo e Maite Ferreiro, concelleira de Cultura, Turismo e Promoción da Lingua, acompañados por concelleiras e concelleiros e representantes de outras institucións, estiveron presentes nas actividades que deron comezo á nova edición da gran festa do outono galego que contará con máis de 200 actividades que se celebrarán ata o vindeiro sábado 12.

O desfile do gando é xa unha das actividades máis destacadas das festas do San Froilán. Organízase no marco do programa da feira agrogandeira Expolugo A Rural organizada coa colaboración da área de Medio Rural da Vicepresidencia da Deputación de Lugo, e conta coa presenza de animais das principais razas autóctonas galegas como a Ovella Galega, Cabra Galega, Galiña de Mos, Porco Celta, Cabalo de Pura Raza Galega, Rubia Galega, Can de Palleiro e Galiña Piñeira.

Maite Ferreiro destacou que esta actividade "busca rememorar a orixe gandeira e popular do San Froilán" e destacou o traballo das distintas asociacións "na conservación do territorio e da paisaxe"

A xornada continuou co pregón a cargo da Artista Multidisciplinar Luz Darriba, que conta cunha importante traxectoria artística con máis de 250 exposicións colectivas, 40 exposicións individuais e recibiu numerosas distincións internacionais. Ademais de Cumulum, liderou proxectos como Porta de Alcalá "Unha porta á cultura" (colocación de 40.000 libros na Porta de Alcalá, Madrid 2001) e "Libres avec des ivres" (10.000 libros colocados a modo de enredadeira na sede da UNESCO en París). Forma parte do TFAP (The Feminist art Project), do IMOW (Museo Internacional da Muller), do Museo da Muller de Costa Rica, e formou parte do persoal da revista virtual Foeminas, pioneira no Estado en materia de xénero, participou na elaboración do I Plan de igualdade entre homes e mulleres de Lugo. Actualmente traballa de xeito multidisciplinar cos diarios da viaxe da súa nai como polizón co seu pai a América. Moitos duros para as mulleres, moi duros para a vida.