Lugo, 05 de marzo de 2025. Rubén Arroxo, Alcalde en Funcións e responsábel da área de Mobilidade, presentou os datos de usuarios no Bus Urbano no mes de febreiro de 2025, uns datos que superan novamente a mellor marca rexistrada desde que o Concello de Lugo garda rexistro de usuarios. Febreiro de 2025 pechou cun total de 188.699 billetes expedidos, superando en 8.627 billetes a marca do ano 2024.

A área de mobilidade continúa a traballar na promoción do bus urbano entre a veciñanza como "un transporte económico que facilita as viaxes, ao non ter que preocuparse de buscar espazo para aparcar". Ademais, o bus urbano de Lugo é o máis barato de Galiza e o terceiro máis barato do estado, cun prezo de 0,64€ o billete ordinario (0,45€ usando a tarxeta cidadá), e 0,31€  no caso do transporte bonificado para as persoas con mobilidade reducida,  pensionistas, desempregadas ou estudantes. Ademais, todas as persoas que utilizan a Tarxeta Cidadá gozan de transbordos gratuítos para os seus desprazamentos.

Para obter a tarxeta cidadá, deberá cubrirse o formulario que se pode atopar na web do Concello, ou recollelo nas oficinas municipais do seminario, e pagar a taxa de 3,09€ nunha oficina de Abanca. Despois, deberá pedirse cita no 010 para retirar a tarxeta nas oficinas do Concello. A recarga do moedeiro será, como mínimo de 5€, cun máximo de 60€.