“Construír unha Baleira con futuro, ese é único interese que move á equipa que formamos o BNG-Asembleas Abertas” sinalou o candidato nacionalista.

Deiros Pardo encabeza a candidatura do BNG-AA co convencemento de que “só o BNG-AA é garantía de honradez, traballo e transparencia para Baleira”.

Baleira, 21 de abril de 2015. Manuel Deiros Pardo, de 63 anos de idade, será o candito do BNG – Asembleas Abertas á Alcaldía do concello de Baleira nas vindeiras eleccións municipais do mes de maio. Traballador da Consellería de Medio Rural e veciño de O Cádavo preséntase “co convencemento de que só o BNG-AA é garantía de honradez, traballo e transparencia para Baleira”.

Democracia e transparencia da man do BNG-AA

Deiros Pardo anunciou que o programa do BNG-AA xirará entorno “á democratización do Concello” para “abrilo ás veciñas e veciños e para rematar coa falta de transparencia que sofrimos a diario”.  “Dende o BNG – AA apostamos por outro xeito de gobernar, baseado no traballo, na seriedade e no respecto rigoroso á democracia” dixo o candidato nacionalista.

“Unha Baleira viva e con futuro” a alternativa do BNG-AA

“Urxe dinamizar e democratizar a vida do concello. No BNG-AA queremos unha Baleira viva, que poña en valor as súas múltiples potencialidades, que aposte polos nosos maiores e pola nosa infancia. Unha Baleira da que as nosas mozas e mozos non teñan que marchar para atopar un traballo digno. Que atenda aos nosos sectores produtivos e ao noso comercio local. Que poña en valor o noso patrimonio cultural e paisaxístico. En definitiva, construír unha Baleira con futuro, ese é único interese que move á equipa que formamos o BNG-Asembleas Abertas.”

Unha campaña moi activa e “porta a porta” para trasladar ás veciñas e veciños a alternativa do BNG-AA

Manuel Deiros Pardo indicou, que “afrontamos estas vindeiras eleccións con ilusión e co convencemento de que é moi necesario un cambio en Baleira, un cambio que só pode vir da man do BNG-AA”. Así mesmo, adiantou que o BNG-AA “levará a cabo unha campaña electoral moi activa, porta a porta, falando con todas as veciñas e veciños para escoitalos e trasladarlles a nosa alternativa para Baleira”.