Lugo, 27 de marzo de 2017. A edil do BNG-AA no concello de Lugo, Maite Ferreiro, propuxo no día internacional do teatro que, dende o concello de Lugo, se poña en marcha un ciclo de teatro para estrear o Edificio do Antigo Cárcere que se inaugurará este xoves. A edil do BNG-AA enlazou esta proposta coa da creación dunha Escola Municipal de Teatro, para a cal se podería aproveitar este novo edificio municipal. “Vemos a grande acollida que ten o teatro en Lugo, o éxito da mostra de Teatro Clásico, e gran número de iniciativas que se está a poñer en marcha dende diferentes grupos e colectivos” dixo Ferreiro que insistiu na necesidade de apoiar as artes escénicas na cidade.

“A Área de Cultura aínda ten fondos sen executar do orzamento do 2016 e poderíanse utilizar para estrear o novo edificio cun ciclo de teatro de pequeno formato” dixo Ferreiro. Ademais dos ciclos habituais de Teatro Clásico e Teatro Universitario o BNG-AA aposta por fomentar as agrupacións e colectivos que fan teatro en pequenos formatos e que “terían un espazo excepcional dentro do edificio do Antigo Cárcere”. Para Maite Ferreiro “o concello ten que preocuparse por dar espazos de participación aos grupos e artistas locais e entendemos que a nosa proposta pode ser ben acollida tanto polo público como polos propios grupos”.

Ademais, Maite Ferreiro insistiu na necesidade de que, de cara a este ano 2017, se empece a traballar na posta en marcha dunha Escola Municipal de Teatro. A proposta de creación dunha Escola Municipal de Teatro xa figuraba no programa de goberno co que o BNG-AA se presentou ás eleccións municipais. Maite Ferreiro destacou o incremento da actividade vencellada ao teatro no concello de Lugo e destacou a implicación e traballo de todos os colectivos e persoas que traballan neste eido.

Maite Ferreiro explicou que “para a creación da Escola Municipal de Teatro fan falta tres cousas: unha partida orzamentaria, un espazo e vontade política para poñela en marcha” e engadiu “Lugo conta con toda a experiencia e coñecemento grazas a toda a xente que leva moitos anos entregada ao mundo do teatro e que sabemos colaborarán co concello para que a Escola Municipal de Teatro sexa unha realidade”. “O goberno terá que falar con todas as persoas e colectivos que se adican ao teatro para deseñar esta Escola que debe ser referente” afirmou Maite Ferreiro.

A respecto do espazo para albergar a Escola Municipal de Teatro, Ferreiro lembrou que “Lugo contará, en breve, con dous novos edificios para os que o goberno municipal aínda non ten usos previstos”. O edificio do Cárcere sería un dos lugares idóneos para a nova Escola Municipal de Teatro “tamén podería estar no novo auditorio ou, incluso, no Gustavo Freire” dixo a edil nacionalista. Maite Ferreiro sinalou que Lugo xa conta con centros públicos para o ensino da danza, de música e artes plásticas pero carece dun centro público de formación nas artes escénicas.

“O éxito do proxecto Buxiganga que o BNG puxo en marcha dende a Deputación de Lugo, cando tivo responsabilidades de goberno, garante o éxito e a necesidade da posta dunha Escola Municipal de Teatro na cidade de Lugo” dixo Maite Ferreiro que apostou por apoiar as artes escénicas e facer que Lugo teña unha vida cultural intensa ademais de “potenciar os grupos profesionais e afeccionados e facilitar espazos para ensaios e estreas das producións que se fan dende Lugo”. Para  BNG-AA “despois do éxito que supuxo a posta en marcha da Escola Municipal de Música, na etapa na que o BNG dirixiu o departamento de cultura do concello de Lugo,  a creación da Escola Municipal de Teatro non ten que supoñer ningunha dúbida para o goberno actual”.