Lugo, 18 de setembro de 2023. O Tenente Alcalde do Concello de Lugo, Rubén Arroxo, acudiu esta mañá á presentación do LII Seminario de Técnicos e Especialistas en Horticultura que acollerá a Escola Politécnica Superior de Enxeñaría do Campus Terra entre os días 18 e 22 de setembro.

Neste seminario darase conta dos últimas investigacións e ensaios realizados no ámbito da horticultura que porán en valor o cultivo de pataca en Galiza, un sector produtivo que, segundo Rubén Arroxo, "é fundamental para a economía galega e para o autoconsumo de toda a poboación do país, polo que é preciso dar a coñecer estes estudos que melloran a súa práctica no día a día".

Este foro escolleu a cidade de Lugo para a súa LII Edición, logo de pasar por diversas localizacións de todo o estado, algo que "supón un orgullo para a cidade ao acoller eventos deste nivel que poñen en valor e dan a coñecer as oportunidades e encantos de Lugo, así como a calidade académica do Campus Terra", explicou Arroxo.