Lugo, 19 de novembro de 2025. Rubén Arroxo, portavoz do BNG e Tenente Alcalde do Concello de Lugo reclamou á Xunta de Galiza que acenda a totalidade do alumeado da Muralla de Lugo. Arroxo explicou que "a pouco máis dunha semana para conmemorar o 25 aniversario da súa declaración como Patrimonio da Humanidade, 106 luminarias do adarve permanecen apagadas, a pesares de que moitas persoas fan uso deste espazo durante a noite".

Rubén Arroxo afirmou que "Lugo está a traballar en poñer en valor o monumento máis importante da cidade, mentres que a Xunta de Galiza, como responsable do seu mantemento, deixa de lado o mantemento do alumeado da Muralla". Segundo Rubén Arroxo, "o bo estado do noso monumento faise máis importante nestas datas, cando estamos a piques de celebrar un momento histórico", explicou.

Arroxo esixiu á Xunta de Galiza a cumprir "e poñer en valor a Muralla, que representa non só un ben histórico senón tamén un gran recurso turístico e cultural, ao ser a única muralla romana que se conserva completa".

O portavoz do BNG afirmou que "este é un novo exemplo da discriminación da Xunta a Lugo", e afirmou que "a falta de mantemento da Muralla únese ao olvido ao que ano tras ano nos somenten nos orzamentos ou á ínfima colaboración da Xunta de Galiza con outro dos eventos máis importantes da cidade, as festas do San Froilán".