Lugo, 28 de outubro de 2025. O portavoz do BNG en Lugo, Rubén Arroxo, acompañado polo responsábel local da formación, Antón Bao, e concelleiros e concelleiras do BNG, presentou a proposta que se levará ao Parlamento Galego como emenda aos Orzamentos da Xunta do ano 2026, para crear un novo aparcadoiro público no barrio de Fontiñas. A proposta do BNG sitúa este novo estacionamento na unión da rúa Primavera, o Carril das Hortas e o Carril das Flores, "un espazo que actualmente se emprega de maneira desordenada como estacionamento e que con esta proposta se convertería nun espazo útil para a veciñanza, dando continuidade á renovación do Carril das Flores que vai executar o Concello de Lugo nos vindeiros meses".

A proposta inclúe a posibilidade de crear un estacionamento de dúas alturas, aproveitando o desnivel existente entre a rúa Primavera e o Carril das Hortas, o que permitiría "optimizar o uso do espazo e ofrecer preto de cen novas prazas de aparcadoiro". Ademais, o proxecto permitiría mellorar a imaxe urbana desta área situada xunto ao Camiño de Santiago, "cun deseño estético integrado en espazos verdes e coherente coa contorna". Esta nova infraestrutura podería contar cun espazo de 3.000 metros cadrados repartidos en dúas plantas que engadirían preto de 100 prazas de estacionamento á zona.

Arroxo lembrou que "hai dous ou tres anos a Xunta anunciara que construiría un novo aparcadoiro en cada cidade, e fíxoo nunha zona con menos necesidade de estacionamento que Fontiñas". Arroxo afirmou que ampliar o estacionamento na zona de Fontiñas conta co consenso de todos os grupos políticos do Concello "non como o aparcadoiro construído pola Xunta na avenida de Breogán", afirmou.

Rubén Arroxo lembrou que a actuación podería desenvolverse mediante os mesmos instrumentos que empregou a Xunta para executar o aparcadoiro da avenida Breogán, declarando o proxecto de interese autonómico. "Se a Xunta quere, pode facelo tamén aquí, porque dispón da lexislación necesaria para intervir neste tipo de solos", subliñou Arroxo, que presentou a idea apoiado en dúas infografías do deseñador lucense Andrés Armesto.

"Facemos unha proposta que é o uso máis útil que se lle pode dar a este espazo de Fontiñas", afirmou Rubén Arroxo, que engadiu "é un barrio que ten unha densidade de poboación moi alta e que necesita espazos para estacionar".