Lugo, 8 de decembro de 2024. O Tenente Alcalde e concelleiro responsábel de Mobilidade, Rubén Arroxo, xunto co concelleiro de Infraestruturas Urbanas, Alexandre Penas, comunicaron a continuidade das obras da rúa Carril dos Loureiros.O proxecto de peonalización da rúa permitirá "avanzar mellora integral do barrio de Recatelo despois de peonalizar practicamente todas as rúas do barrio". As obras seguen o seu curso seguindo as directrices do proxecto elaborado polo Concello despois de manter unha serie de xuntanzas coa veciñanza entre os anos 2022 e 2023.

A rúa terá unha conversión en plataforma única de preferencia peonil, mantendo o acceso a vehículos a baixa velocidade para residentes e carga e descarga. A renovación da rúa inclúe tamén a renovación dos servizos soterrados, como o abastecemento ou o saneamento, e a creación de novas zonas verdes para, segundo explicou Rubén Arroxo, "facilitar que haxa zonas de sombra ao longo da rúa que permitan desfrutar da zona de paseo en xornadas de calor". Ademais, o Goberno de Lugo avanzará na instalación de alumeado LED, "garantindo un alumeado de baixo consumo e uniforme en toda a rúa", explicou o Tenente Alcalde.