Lugo, 21 de decembro de 2024. O Tenente Alcalde do Concello de Lugo, Rubén Arroxo, anunciou que a área de Mobilidade estuda un proxecto para modificar a unión da rúa Afonso X coa Rolda de Fingoi. Arroxo afirmou que "seguimos a traballar en mellorar a mobilidade na cidade, aumentando a seguridade peonil mentres se mantén a fluidez do tráfico", e engadiu "proxectamos unha rotonda neste cruce, actualmente regulado por semáforos, que mellore as condicións de seguridade da intersección".

A intersección da rúa Alfonso X coa Ronda de Fingoi é na actualidade un cruce regulado por semáforos no que conflúen viais de similar intensidade de tráfico. No aspecto visual é un espazo espido, en contraste co bulevar da Ronda de Fingoi, e de dimensións demasiado altas para ó tráfico que soporta.  Coa mellora da intersección preténdese acadar unha mellora tanto funcional como estética e de integración na contorna, mellorando a seguridade da intersección viaria ó mesmo tempo que se reducen os tempos de espera.

Con esta actuación, o Goberno de Lugo busca eliminar os semáforos creando unha rotonda axardinada, e redeseñando as entradas para garantir a seguridade dos peóns e manter a continuidade da rúa. Adaptarase o alumeado ó novo deseño, avanzando na implantación de alumeado LED e modificarase a rede de saneamento para garantir a correcta drenaxe da intersección.