Alcaldes socialistas manifestaron a súa intención de negarse ao pago desta subida decretada dende o goberno da Xunta

“Unha suba imposta polo PP para salvarlle os resultados ás eléctricas” dixo Paz Abraira

Lugo a 10 de xaneiro de 2014. A voceira do grupo do BNG do concello de Lugo, Paz Abraira, demandou do alcalde de Lugo que desvele as súas intencións sobre o canon de SOGAMA. Abraira lembrou que foron moitos os alcaldes do partido socialista que manifestaron a súa intención de negarse a pagar este canon e “non sabemos se Orozco vai actuar á marxe do partido socialista”. Abraira engadiu que “o BNG ten clara a súa postura pero gustaríanos saber que é o que o opina o partido socialista de Lugo e que é o que vai facer o concello de Lugo con Orozco á cabeza”. Respecto desta suba nas taxas de SOGAMA, Abraira asegurou que “é unha suba imposta polo PP para salvarlle os resultados ás eléctricas”.

Abraira criticou que o alcalde socialista de Lugo en ningún momento aclarou se vai a negarse á suba das taxas o se vai facer o que presentou nos orzamentos, que o BNG non aprobou, e que é “repercutirlle, a partir de marzo, esa suba aos veciños e veciñas de Lugo”. A voceira nacionalista dixo que “o BNG pregúntase se Orozco actúa á marxe do PSOE ou se forma parte do PSOE” xa que “representantes do partido socialista na xuntanza de Compostela deixaron clara a súa postura: opoñerse ao pago da suba das taxas de Sogama e presentar recursos contra esta suba”.

O pasado 21 de decembro celebrouse unha xuntanza de rexedores en Compostela, á que non acudiron representantes do PP, mais si estiveron representados BNG, PSOE e outras forzas políticas. Nesta xuntanza acordouse solicitar unha entrevista co presidente da Xunta e, de non producirse avances reais na negociación sobre a suba, os concellos negaríanse a pagar esta suba. Unha suba de taxas que Abraira cualificou de inxustificada xa que “os concellos teñen asinados contratos con SOGAMA por unha cantidade e durante un tempo onde se especificaba que se ían subir as taxas somentes o IPC”.

Para o BNG compre saber “que vai facer o alcalde de Lugo e se existe un único partido socialista en Lugo”. O reprensentante do PSOE na xuntanza, antes mencionada, era un deputado provincial, o Sr. Martínez, que segundo asegurou Paz Abraira “alí falaba en nome dos alcaldes socialistas da provincia de Lugo e dixo que a postura dos socialistas sería a de presentar recursos á suba e negarse ao seu pagamento”. Abraira tamén quere saber se o concello está xa estudando se é posible recurrir legalmente, como está facendo o de Vigo, a suba das taxas para impedir que “os cidadáns paguemos cada vez máis por servizos de peor calidade”.

Críticas á actitude de Orozco con Luis Lamas

Abraira criticou tamén que Orozco fora a darlle os parabéns a un presidente de SOGAMA que insultou, na súa visita, a todos os lucenses cando nos di que somos responsables do que está acontecendo. O BNG solicitara, no seu momento, a dimisión de este lucense como presidente de SOGAMA. Abraira lembrou que recentemente houbo unha visita recente de Luis Lamas a Lugo, para presentar un programa de compostaxe caseira, e o alcalde non aproveitou a visita para reclamarlle ao presidente de SOGAMA a retirada desta suba.