Arroxo sinalou que “hai que apostar por outro modelo de cidade no que os coches respeten ás persoas e así evitar os atropelos”

Membros da candidatura do BNG - Asambleas Abertas presentaron as liñas que centrarán o seu programa electoral

Lugo, 17 de abril de 2015. Rubén Arroxo, acompañado de membros da canddidatura do BNG – AA deu a coñecer as liñas básicas que centrarán o seu programa electoral. Arroxo apostou por un modelo de cidade “máis amable coas persoas” e anunciou que “pularemos por implantar zonas 30 na maior parte da cidade”. Arroxo dixo que as nosas prioridades son primeiro as persoas, segundo as bicicletas, terceiro o transporte público e cuarto os vehículos. Arroxo lembrou que no que vai de ano xa van máis dunha decena de atropelos de peóns na cidade de Lugo e dixo que “hai que apostar por outro modelo de cidade no que os coches respeten ás persoas e así evitar os atropelos”.

O candidato do BNG – AA enumerou un total de 5 eixos fundamentais arredor dos que se desenvolverá o programa de goberno da candidatura nacionalista. Para Arroxo será prioritario traballar na creación de emprego e a respecto da política impositiva destacou que “terá que pagar máis quen máis ten”. Rubén Arroxo asegurou que “hai que cubrir as necesidades básicas das persoas e ninguén pode pasar fame, nin frio, nin durmir na rúa neste concello”.

Outra das liñas a seguir marcadas polo candidato do BNG – Asambleas Abertas será a de “respetar e axudar a quen traballe nos ámbitos da igualdade, da cultura e do deporte xa que”, engadiu “apostamos pola vida neste concello e faremos que Lugo funcion”. Rubén Arroxo dixo, en referencia aos edificios públicos abandoados que hai no concello actualmente, que “Lugo non quere máis edificios sen contido” e para esto asegurou que “contras as obras faraónicas que outros propoñen nos apostamos por darlle utilidade ao que xa hai, rehabilitar e rehabitar a nosa cidade”.

Rubén Arroxo tamén destacou que, en canto ás políticas para as parroquias e o medio rural, “darémoslles voz aos veciños e veciñas por que quen vive nas parroquias ten os mesmos dereitos que quen vive na cidade e nos imos escoitar, atender e resolver as súas demandas”. “Non imos continuar as políticas caciquís iniciadas polo PP e continuadas polo PSOE” concluiu Arroxo.

Arroxo reiterou a necesidade de que se execute a propota do BNG de dotar a Lugo cunha zona pública de baño e de implementar as medidas necesarias para eliminar a contaminación do río Miño. “O río Miño e o seu entorno é un espazo privilexiado e por eso precisa dun coidado comprometido para que todos e todas poidamos disfrutar nel” dixo Arroxo.