Para Rubén Arroxo “A supresión improvisada do sistema ORA converterá o mes que vén o estacionamento en misión imposible”

Lugo, 6 de agosto, 2015. Tras o paso dunha semana dende que rematou o sistema ORA, o BNG - Asembleas Abertas ve con preocupación a situación na que quedan as zonas de estacionamento da contorna do casco histórico. “Estamos no mes de agosto e xa resulta difícil atopar onde estacionar, cando chegue setembro e se retome a actividade normal da cidade, isto vai ser un caos” explicaba Rubén Arroxo, que ve ao goberno municipal cunha tranquilidade irresponsable con este tema, obviando a saturación que se poida dar cando se retome a actividade escolar e a xente regrese das vacacións “a supresión improvisada do sistema ORA converterá o mes que vén o estacionamento en misión imposible”. Dende o grupo nacionalista volven cuestionar a fórmula na que se levou a cabo e cren que é o momento para apostar por un novo sistema, o cal permita estacionar de forma gratuíta durante un período limitado de tempo que podería estar nos 45 minutos “nós xa levábamos no programa a proposta de dar un tempo limitado gratuíto, agora é o momento idóneo para executalo, permitindo así que quen vaia estacionar pouco tempo, non teña que pagar” afirmou o voceiro nacionalista.

O voceiro do BNG – Asembleas Abertas puxo fincapé en que a xestión dun sistema de control do estacionamento “non se pode deseñar nin con fins recaudatorios, nin con fins de que unha empresa veña facer negocios, senón que ten que estar pensado en que as veciñas e veciños teñan onde deixar o coche cando teñan que ir ao centro”, e en canto a iso piden que se estude dende o concello as posibilidades legais de ofrecer unha xestión directa

Rubén Arroxo tamén quixo preguntar sobre que vai acontecer cas persoas que traballaban no sistema ORA, e esixiu ao concello que se teñan en conta de forma responsable “hai persoas que levan moitos anos aí, e unha institución pública non pode promover que da noite para a mañá queden no paro”.

Dende a organización nacionalista tamén aproveitaron para lembrar que Lugo precisa con urxencia dun plan estratéxico de mobilidade, ao que Arroxo lembrou que xa están a traballar dende o BNG-AA no deseño dun proxecto co fin de promover o uso da bicicleta, apostar por aparcadoiros disuasorios, avanzar na peonalización, converter novas rúas en sentido único, ou mudar os límites de velocidade entre outras cuestións.