O BNG DE GUITIRIZ PRESENTA UNHA PROPOSTA DE CONSENSO PARA DESBLOQUEAR A CASA DA BOTICA
Para o BNG é imprescindíbel que se abandonen posturas de enfrontamento partidario
O BNG presentaralles esta iniciativa ás representantes da plataforma Falemos Claro
Guitiriz, a 19 de xuño de 2014. O BNG de Guitiriz ven de poñer enriba da mesa unha proposta de consenso dirixida aos grupos municipais de PSOE e PP no Concello Chairego para desbloquear a construción dunha residencia pública na Casa da Botica.
O voceiro do BNG, Xosé Lois González Souto (Pereira), explicou que a nosa proposta está articulada en cinco puntos que esixirían deixar de lado as loitas partidarias e poñerse a traballar arreo, e de xeito conxunto, para evitar que se perda unha importante inversión e unha dotación moi necesaria para darlle a atención debida á envellecida poboación de noso Concello
O voceiro nacionalista enumerou os diferentes puntos advertindo que é imprescindíbel que se abandonen posturas de enfrontamento e se analicen dende a responsabilidade e a xenerosidade política.
- Consenso en levar a cabo o proxecto segundo está redactado pola Deputación coma 1ªfase. Nesta 1ª fase habilitaríanse as zonas comúns (comedor, salas de xogos e actividades) coma centro de día de xeito temporal.
- Compromiso político das tres forzas para engadir unha 2ªfase/ampliación ó proxecto que inclúa o centro de día e ampliar as prazas de residencia. A partir da construción desta 2ªfase/ampliación a zona de residencia funcionaría ó 100% da súa capacidade.
- O Concello mercaría os terreos adxacentes ós que xá aporta coa Casa da Botica con cargo ó remanente de Tesourería que existe actualmente (400.000 dispoñíbeis a partires do ano 2016).
- Compromiso político das tres forzas para defender a 2ª fase/ampliación na Xunta e Deputación para a sinatura dun convenio colaborador que permita a súa execución.
- Compromiso político para demandar de Xunta de Galiza e Deputación a sinatura dun convenio de colaboración que permita sufragar o custo do centro de día actual mentres non se poña en funcionamento a 1ªfase.
Os nacionalistas remitirán esta proposta aos grupos políticos municipais de PP e PSOE. Segundo informou Xosé Lois González Souto (Pereira) o BNG pedirá a celebración dun pleno extraordinario a principios de Xullo para analizar esta proposta e outras en caso de habelas. Pereira engadiu o BNG celebrará unha xuntanza para presentarlle esta iniciativa ás representantes da plataforma Falemos Claro que xa se reuniron cos mandatarios de Concello e Deputación, para recadar as súas opinións e achegas.
