“A Confederación Hidrográfica, presidida por un representante do PP, parece que utiliza máis criterios de carácter político que de carácter técnico” dixo Paz Abraira 

Para o BNG está claro que o PSOE non acometeu todas as medidas precisas para dotar a Lugo desta infraestrutura 

Lugo, 27 de outubro 2014.  A voceira do BNG no concello de Lugo, Paz Abraira, levou hoxe á comisión de mediambiente unha batería de preguntas sobre a evolución das xestións do concello de Lugo para a construción dunha zona pública d baño no río Miño. Abraira anunciou que “o BNG seguirá insistindo para que o concello de Lugo conte cunha zona pública de baño para o vindeiro verán”. Os nacionalistas reiteraron a necesidade de saber se o Goberno Municipal coñece as razóns que levaron a Deputación Provincial a non continuar cos trámites necesarios para dotar a Lugo dunha zona pública de baño no entorno da área recreativa dos Robles e por que aceptou o Goberno municipal a paralización de dito proceso sen demandar da Deputación a presentación do informe de impacto ambiental.

Para o BNG está claro que o PSOE non acometeu todas as medidas precisas para dotar a Lugo desta infraestrutura e “un ano máis os lucenses quedaron sen un lugar axeitado para disfrutar do seu río”. Abraira mantivo que “para o BNG a ubicación perfecta está situada no entorno da área recreativa dos Robles” e engadiu que “deben aproveitarse as instalación de Os Robles para as dotacións da zona pública de baño”. Abraira sinalou tamén que “chama a atención a actitude do PP en todo este asunto”

Abraira referiuse, no debate en comisión, á entrevista publicada por un xornal local na que o Presidente da Confederación Hidrográfica Miño-Sil (CHMS) afirmaba que nin Deputación nin Concello de Lugo fixeron as xestións oportunas para dotar a Lugo dunha zona pública de baño no entorno da área recreativa da Deputación e dixo que “A Confederación Hidrográfica, presidida por un representante do PP, parece que utiliza máis criterios de carácter político que de carácter técnico á hora de impedir a ubicación dunha zona pública de baño pero dalle o visto bon, sen máis problemas, a instalación dunha estación de servizo a menos de 100 metros do río”.