“A XUNTA NON FIXO NADA DO PLAN PARADAI DESDE QUE FEIJOO ESTÁ COMO PRESIDENTE, ESTA É A REALIDADE” DIXO COSME POMBO

Para o BNG “Lugo e os veciños de Paradai non poden pagar continuamente a incompetencia de PP e PSOE”

Lugo, a 21 de xaneiro de 2014. O BNG presentará unha iniciativa no Parlamento Galego para que a Xunta inicie as obras do Plan Paradai. Cosme Pombo asegurou que “a Xunta de Galiza non fixo nada do Plan Paradai desde que Feijoo está como presidente, esta é a realidade”. Pombo lembrou que “a responsabilidade da execución destas obras é da Xunta” e “aos veciños e veciñas xa non lles valen desculpas de mal pagador”. Pombo acusou ao presidente da Xunta de “castigar continuamente a Lugo” e ao concelleiro do PP, Jaime Castiñeira, de “exercer de Delegado da Xunta en Lugo para crear confusión entre a xente e tratar de salvarlle a cara a Feijoo”

Cosme Pombo dixo que “Lugo e os veciños e veciñas de Paradai non poden pagar continuamente a incompetencia de PP e PSOE”. Pombo dixo que o BNG presentará preguntas para averiguar cal é a razón para que as obras de Paradai continúen sen iniciarse. Segundo Cosme tanto Feijoo, como o conselleiro de infraestruturas como “o delegado autonomeado”, Jaime Castiñeira, “están a rirse dos lucenses” despois de mandar as maquinas a traballar durante unha semana, volver a paralizar a obra e agora botarlle as culpas ao concello de Lugo.

Para o BNG “non é asumible por ninguén que o conselleiro diga unha cousa e que o edil, e tamén parlamentario, Jaime Castiñeira diga outra mentres as obras continúen paradas”. Os nacionalistas pedirán no parlamento que o Conselleiro aclare cales son “as causas técnicas” da empresa, ás que se referiu o pasado venres en Lugo, para que as obras continúen paradas ou se realmente existe, tal e como dixo Castiñeira, un conflito entre Xunta e Concello que impida a continuación das obras.