En referencia á intermodal Cosme Pombo dixo que “non vai chegar no curto prazo e hai que deixarse de anuncios e ilusionismos coa primeira pedra, a maqueta e as fotos do conselleiro correspondente”

O uso do transporte público na área metropolitana incrementouse nun 88% e Lugo precisa dunha estación acorde co século XXI

Lugo, 24 de marzo, 2014. O BNG levará ao parlamento unha iniciativa para demandar da Xunta de Galiza que acometa unha reforma en profundidade da estación de autobuses de Lugo. O parlamentario nacionalista, Cosme Pombo, compareceu diante do edificio da Estación de Autobuses de Lugo acompañado por concelleiros e responsábeis do BNG da comarca de Lugo. Os nacionalistas demandan unha rehabilitación integral do edificio que poña estas instalacións á altura do século XXI. Os nacionalistas realizaron unha visita ao edificio da Estación de Autobuses e comprobaron como, por exemplo, a sala de espera da planta superior segue pechada cuns taboleiros atados con aramios.

Pombo dixo que “compre mellorar esta estación que dende hai moito tempo precisa unha reforma en profundidade”. O parlamentario do BNG sinalou que a estación de Lugo é a primeira imaxe da cidade para moitos visitantes e está situada ao pé da muralla e do que vai ser un centro cultural de referencia na cidade. Cosme Pombo afirmou que “é de xustiza que se fagan inversións neste edificio para que se equipare ás condicións da maioría das 43 estacións de autobuses que hai en Galiza”. Para o BNG a estación de Lugo non conta coas condicións de seguridade, confortabilidade e hixiene necesarias para unha instalación este tipo.

En referencia á intermodal Cosme Pombo dixo que “non vai chegar no curto prazo e hai que deixarse de anuncios e ilusionismos coa primeira pedra, a maqueta e as fotos do conselleiro correspondente asinando protocolos co ministro de turno”. Pombo asegurou que “o BNG desexa, para Lugo, que a estación intermodal chegue canto antes, pero os feitos demostran que esto non se vai producir a curto prazo e mentres as persoas que entran e saen de Lugo  teñen que sufrir o mal estado da Estación de Autobuses”.

A actual situación de crise económica fai que se incremente de xeito moi considerable o número de usuarios do transporte público. Na visita de hoxe tanto os representantes do BNG como os medios de comuniciación puideron comprobar o elevado número de persoas que transitan pola Estación de Autobuses de Lugo. Esto xustifica, sen dúbida, a necesidade urxente de acometer obras de rehabilitación neste edificio da Xunta de Galiza.  Cosme Pombo fixo referencia ao aumento do 88 % do número de usuarios en Lugo e no seu entorno. “recentemente os medios de comunicación, segundo datos da propia Xunta de Galiza, reflexaban que máis de 300 mil viaxeiros no 2013 utilizaron o sistema de transporte mentropolitano en Lugo”.