“É unha mostra máis do desleixo do goberno municipal que non teñan capacidade nin para repoñer unha placa na praza Maior da cidade” dixo Cristina Ferreiro

A placa fora colocada sobre o tronco desecado dun dos negrillos que foron talados no fondo da praza Maior tras a remodelación da mesma no ano 2003

Lugo, 25 de novembro 2014. A edil do BNG no concello de Lugo, Cristina Ferreiro, pediu que se volva a colocar a placa conmemorativa das obras de remodelación da praza Maior. Esta placa estaba situada nun tronco de negrillo desecado e foi instalada no ano 2003 cando remataron as obras de remodelación da praza Maior. Cristina Ferreiro dixo que “é unha mostra máis do desleixo do goberno municipal que non teñan capacidade nin para repoñer unha placa na praza Maior da cidade”.

A edil nacionalista dixo que a placa xa leva tempo desaparecida da súa ubicación orixinal e o goberno municipal xa tivo tempo dabondo para a súa substitución “non é comprensible que se desatenda deste xeito unha das zonas máis visitadas da cidade” afirmou Ferreiro. Cristina Ferreiro lembrou que a tala dos olmos negrillos do fondo da Praza Maior fora motivada por unha enfermidade.