Outeiro asegura que quen codirixiu e coparticipou no roubo dos aforros de milleiros de galegos a través das participacións preferentes non pode merecer dita distinción

O portavoz nacionalista acusa á Xunta de pasotismo fronte ao maior escándalo financeiro da historia do país

“Non entendemos por que se xera tanto escándalo coas condicións do rescate a Chipre cando en Galiza hai máis de 2 mil millóns de euros atrapados en preferentes”

Lugo,  21 de marzo de 2013.  O Grupo Provincial do Bloque Nacionalista Galego defenderá, no vindeiro pleno da Deputación, unha moción na que se solicita a retirada das honras outorgadas pola institución ao ex director xeral de Caixa Galiza, José Luis Méndez López, tras a súa neglixente xestión ao fronte da citada entidade.

Así o explicou o portavoz nacionalista, Mario Outeiro, quen puntualizou que a Deputación outorgoulle en 2003 a medalla de ouro, máxima distinción concedida polo ente provincial, ao considerar que a entidade financeira que dirixía Méndez López aportaba a Lugo, vía impostos e a través da Obra Social, importantes recursos para o financiamento de proxectos e convenios de colaboración.

“Non se pode permitir – afirmou Outeiro- que unha persoa que sobreendebedou a entidade que dirixía pola súa sobreexposición ao sector inmobiliario, que ademais é corresponsábel do deseño e comercialización das participacións preferentes coas que milleiros de galegos e galegas foron estafados e nas que teñen os seus aforros atrapados e que, en plena crise económica, percibiu unha cuantiosa xubilación, goce de tan importante distinción; non é merecedora dela nin de todo o que a medalla de ouro da Deputación supón para todos os lucenses.”

Dende o Grupo Provincial do BNG entenden que “Méndez é hoxe aínda menos merecedor desta honra ca onte; xa que estamos a unhas horas de que o Goberno do Estado dea a coñecer cal será a quita que se aplicará aos aforros dos afectados polas participacións preferentes. Máis que unha quita é un roubo. Con independencia da porcentaxe que se decida, o resto dos aforros converteranse en accións dunha entidade que está arruinada e que valen menos de cero.  E non podemos esquecer que a esta situación chegouse, en parte, grazas ao ex director de Caixa Galiza.”

Mario Outeiro denunciou, tamén, o cambio de postura do Partido Popular  na busca de solucións para o que é o maior escándalo financeiro da historia de Galiza e acusa ao presidente da Xunta, Alberto Núñez Feijóo, de manipular aos galegos e ás galegas estafados polas participacións preferentes colocadas polas antigas caixas prometéndolles solucións que non chegan. Neste senso insistiu en que “o pasotimo do Goberno galego cara este roubo ao pobo chega até tal punto de que o número de arbitraxes diarios durante a campaña electoral das últimas eleccións galegas era, aproximadamente, de 250, e  tras o remate da mesma as arbitraxes reducíronse até entre 10 e 20 ao día.”

“Non entendemos –conclúe o portavoz nacionalista- por que se xera tanto escándalo coas condicións do rescate da Unión Europea a Chipre cando no noso país hai 2 mil millóns de euros atrapados en participacións preferentes.”