O cabeza de lista do BNG pola provincia de Lugo, Cosme Pombo, afirmou no acto desta tarde en Vilalba que “Galiza precisa un BNG forte que frene a política antisocial do PP cuxas consecuencias estamos a padecer”

Vilalba, 18 de setembro de 2012.O BNG organizou esta tardiña en Vilalba un acto político de carácter público onde os nacionalistas analizaron as consecuencias económicas e sociais dos recortes do PP e as alternativas que defende o BNG. O cabeza de lista do BNG pola provincia de Lugo, Cosme Pombo, afirmou no acto desta tarde en Vilalba que “Galiza precisa un BNG forte que frene a política antisocial do PP cuxas consecuencias estamos a padecer”. Para Cosme Pombo, “fronte a estas políticas, que tentan utilizar a crise como pretexto para impoñer o modelo que lle interesa á dereita, o BNG tamén ten como prioritario a defensa e proteción dos servizos públicos e as políticas sociais, pois son fundamentais para o benestar da xente e neste momento están sendo desmantelados para facer do ensino e da sanidade, por exemplo, un negocio”.

Cosme Pombo afirmou en Vilalba que “xa sabemos a onde nos levan as políticas do PP: a unha perda cada día máis alarmante de dereitos sociais e ao empobrecemento da clase traballadora. Non hai máis que botar unha ollada ao que temos ao noso redor, un país no que medra alarmantemente a súa débeda, cos sectores produtivos propios practicamente en estado de creba, como podemos comprobar moi ben nunha comarca como a Terra Chá pola situación que están a vivir os gandeiros produtores de leite. Outro dos eixos sobre os que xirará o programa nacionalista ten a ver coa rexeneración democrática, -explicou o candidato do BNG, quen advertiu da perigosa política na que está inmersa a dereita de degradación da democracia e das institucións”.

“Hai que facerlle fronte -dixo- e iso pasa tamén por afortalar o autogoberno e avanzar cara a soberanía, porque a crise está evidenciando que a ausencia de soberanía conduce á ausencia de democracia e a que as decisións que tan directamente afectan aos cidadáns se tomen en ámbitos que non emanan da vontade democrática dos pobos”. Neste sentido, Cosme Pombo lembrou que é fundamental que Galiza teña o control da súa propria economía, de aí a necesidade por exemplo dun Banco Público, e dos seus recursos para poder xerar emprego e garantir o benestar colectivo”.

Pola súa banda, Félix Jorquera, portavoz do BNG no Concello de Vilalba e que será concelleiro a partires do vindeiro pleno introduciu o acto, e destacou que “todos os galegos e galegas xogámonos moito nestas eleccións e diso somos conscientes no BNG, a forza nacionalista que constitúe a alternativa ás políticas antisociais de Feijóo e a forza nacionalista galega que ten como único destino e atención do seu ideario político e centro da toma das súas decisións a Galiza e a súa xente”.

Inés Novo, tamén concelleira do BNG en Vilalba após da súa toma de posesión no vindeiro pleno e candidata por Lugo ao Parlamento Galego, e recoñecida polos seus anos de traballo no programa Preescolar na Casa, fixo unha crítica valoración da política educativa do goberno de Feijóo “que o único que fixo foi recortar na escola pública e do rural galego baixo o pretexto da crise para denostar o ensino público a favor do privado”

O portavoz nacional do BNG, Guillerme Vázquez, agradeceu a asistencia do máis do cento de persoas a este acto público porque afirmou que “non hai que ter medo a falar de política, malia que nos traten de dicir agora que a política é mala, o que hai que diferenciar é da “mala política” como está a levar a cabo os gobernos do PP na Xunta de Galiza e no Estado. Non se lle pode ter medo ás palabras e todo pobo necesita soberanía, non debemos ter medo a reclamar a nosa soberanía como galegos e galegas, e que as decisións se tomen tendo en conta a nosa realidade en casos tan claros como o naval ou o sector lácteo”.