O BNG – Asembleas Abertas levará ao pleno do xoves unha moción de urxencia para reclamar a implicación de todos os grupos “nunha protección real do Miño e do seu entorno”

Olalla Rodil lembrou que “a Confederación Hidrográfica, dependente do goberno central, autorizou estas obras e a instalación dunha gasolineira e desautorizou a creación dunha zona de pública de baño”

Lugo, 23 de novembro de 2015. O voceiro do BNG – Asambleas Abertas visitou as obras que se están executando no cauce co río Miño na zona  de As Saamasas. Rubén Arroxo estivo acompañado da candidata de Nós – Candidatura Galega, Olalla Rodil que lembrou que “a Confederación Hidrográfica, dependente do goberno central, autorizou estas obras e a instalación dunha gasolineira e desautorizou a creación dunha zona de pública de baño”. Olalla Rodil afirmou que “esta é unha mostra máis da necesidade de contar cunha forza política propia en Madrid que defenda os nosos dereitos e a nosa dignidade”.

Pola súa banda Rubén Arroxo afirmou que “o que está pasando no río Miño é un insulto para Lugo e a intelixencia de todos nós” e informou que O BNG – Asembleas Abertas levará ao pleno deste xoves unha moción de urxencia para rexeitar o “atentando ecolóxico” que se está a executar no cauce do río. Arroxo sinalou que esta actuación “foi permitida para incrementar os beneficios dunha empresa privada e está a executarse no mesmo lugar no que non se autorizou a creación dunha zona pública de baño”. O voceiro nacionalista fixo, tamén, referencia as sospeitas e investigacións xudiciais baixo as que estivo a empresa adxudicataria polos supostos tratos de favor por parte dun ex-membro do goberno municipal socilista.

Arroxo afirmou que “en menos dun ano Lugo, e todas as persoas que aquí vivimos, sufrimos dúas actuacións que constitúen un verdadeiro atentado contra o medio ambiente, contra o río Miño e contra o seu entorno”. Rubén Arroxo lembrou a instalación dunha gasolineira a menos de 60 metros do cauce do río e “agora estanse acometendo unhas obras que producen un tremendo impacto ambiental no cauce do río e nas súa beiras” afirmou. En ámbolos dous casos todas as administracións implicadas concederon as autorizacións para a execución das obras. Pola contra o goberno municipal incumpriu todos os acordos tomados neste concello para a creación dunha zona pública de baño. A construción da zona pública de baño non foi efectivizada polos informes que lle recoñecían a esta mesma zona unha especial protección.